Saturday, December 17, 2022

අසරණව | Broken

 


පාටකූරු පෙට්ටිය අරගෙන
රූප පොත පෙරළාගෙන
පොඩි පුතු විමසයි
රූපෙට දියයුතු පාට...

චොකලට් කෑල්ල චොකලට් දුඹුරුය
ස්ට්‍රෝබෙරි ගෙඩිය ස්ට්‍රෝබෙරි රතුපාටය
බ්ලූබෙරි නම් දම්පාටය
දොඩම් ගෙඩිය අපේ කොළපාටය
රට ඒවා ඔරේන්ජ් පාටයි
නෙව පුතේ...

පාටකූරු කෑලි තෝරන පොඩ්ඩා
නහය ඇඹුල් කරගෙන අතරමංව!
චොකලට් පෙත්තක, රස පළතුර
මතක නැද්ද පුතේ?
දුක හිතුණා...

රුපියල සරුංගෝලය
රුකුල් දි දී අහසේ නැගලා
වරල් සල සලා ඔහේ පාවෙනවා
කඩ රාක්ක උසින් උසය 
අපි කුරු මිනිසුන් කරලා
සුරංගන කතා කියන පාලකයා
පඩිපත හූරනවා...


English version: Broken

Monday, December 12, 2022

වැසි දිය බිඳිති - Rain Droplets

 


හතර වටින් කළු කරගෙන
වැහි වලාවක් ඇදුණා
කුරුලු රෑන විග විගහට
කූඩු කරා තටු සැලුවා...

දළුකොළ පොහොට්ටු නොරිදවා
හීන් පොදක් හෙමිහිට වැටුණා
වියළි පොළොව සතොසින් තෙමුණා
පළාතම සුවඳින් පිරුණා

උඩින් උඩින් එල්ලීගෙන දුවනා
කණුවෙන් කණුව හිරවි ඇදෙනා
විදුලි රැහන් පොද වැස්සේ
ඔහේ තෙමුණා

පුංචි පුංචි දිය බිඳු සැදී
කළු රැහැන් දිගේ මුතුපෙළක්!
එල්ලීගෙන සීරුවෙන් යටිකුරුව 
කණු දෙපසින් පල්ලම් බහිනා

දෙපසින් එන අතරමං කුහුඹුවන් විලස
හැපි උරෙන් උර තුටිනා
ලංවි කියන්නේ රහසක් දෝ
රැහැනින් සමුගෙන මිදෙනා

වැස්ස සෙමින් මෝරනවා
මුතුකැට ටික ටික ලොකු වෙනවා
රැහැන් දිගේ කඩිමුඩියේ ඇදෙනා
ගමන ටික ටික කෙටි වෙනවා

විනිවිඳ පෙනෙන දියබිඳු අඳුරේ
බර වැඩි වුණි ද තරම ලොකුවි
කඩා හැලෙනවා ගමන මගදී
නිති අනිති රැඟුම විදහා

Monday, November 21, 2022

ඇවිද බලන්න



විනිශ්චය කරන්න කලින්
කැමැති නම් එන්න
දෙන්නම් පාවහන් යුගල මගේ
ඇවිද බලන්න
පොඩි දුරක්,
මතක ඇතිව
මේස් කූට්ටමක් අරගෙන එන්න

Wednesday, October 26, 2022

වෙලාව | To Show

 


ගැටෙන එකිනෙක
ලොකු පොඩි
දැති රෝද
හඬ නොහඬ
හුරු නුහුරු
වුව නොවුව ද
මුහුණත
පෙන්විය යුතුමය
වෙලාව
ටික් ටික්ගා
දුවනු මැන නොනැවතී
හීන් පොඩි ලොකු
කට්ට...

Wednesday, October 5, 2022

නුඹ මිස වෙන කවුරුද

 


පොද පොද වහින වැස්ස
දිලෙන රැස්දෙන හිරු
කැළුම් දෙන සඳ
නුඹ මිස

ඉවුරු සුරකින ගංදිය
රන් වැලිකැට පිරි වෙරළ
රිද්මය දෙන හද
නුඹ මිස

ඇසැ'ති ඉඳි කටුව
සිහින් හූයන් ඇදගෙන යන
රිදුම් දුන්න ද රටා මවන
නුඹ මිස

නිම් නැති ගිම්හානය 
හැලුනත් කොළ හැම
වසන්තයම පතන හෙමන්තය
නුඹ මිස

නිමි නිමි දිලෙන තරුකැට
අඳුරු අහස යට
නවසඳ යදින සේපාලිකාව
නුඹ මිස,
වෙන කවුරුද දිරි දෙන

Sunday, September 25, 2022

සෙනෙහබර තිත්කොමාව

 


ජීවිතයට අරුත්බර විරාමයක් එක්කර ගැලීමක් දුන් තිත් කොමාවට (;) සෙනෙහසින්...

Tuesday, September 13, 2022

හිදැස the Space


 

හිදැස
විටෙක අනන්ත අප්‍රමාණ සාගරයේ ඈත
පෙනෙන නොපෙනෙන ක්ෂිතිජය තරම්
පරතරයක්…
ගව් ගානක දුර හිටියත් මොහොතකින්
සැරිසැරිය හැකි
ළඟපාතක්…
තවත් සමහරවිට ඇලී ගැලී ළඟම හිටියත්
හිතෙන් ලං නොවූ
රික්තකයක්…
පමණක් අවස්ථාවල ජීවිතය අරුත් බර
කරන්න නිසි තැන දී 
ලැබිය යුතු, ලබා දිය යුතු,
පුංචිම පුංචි ඇසට පෙනෙන, නොපෙනෙන
දායාදයක්, වස්තුවක්
නොවෙද...

Sunday, September 4, 2022

ජීවිතයට අරුම හතක් | 7 Wonders for Life

 



දකින්න - ලස්සන හැමවිටම
අහන්න - උවමනාවෙන්, දෙසවන් යොමා
ස්පර්ශ කරන්න - සිත් පිරිමදිමින්
රසවිඳින්න - රසාංකුර විතරක් නෙවෙයි සිත, ඇස්, කන් ද පිනවමින්
දැනෙන්න - මුවින් නොකියන හිතක හැඟුම්
සිනාසෙන්න - සතුට බෙදමින්
ආදරය කරන්න - මින් පෙර කවදාවත් නොකර ලෙසින්


Wednesday, August 31, 2022

කැරැල්ල Never Give Up

 


කැරැල්ල අතනෑරපු මිනිස්සු
කැරැල්ල හිතට ගත් බොහෝ අය මොන මොන හෝ හේතු නිසා කාලයක් යද්දි කැරැල්ල අතෑරියා, ඒත් කැරැල්ල අතනෑරපු මිනිස්සුත් ඉන්නවා...
  • නූල් කැරැල්ලේ පොට දෙක, තුන අමුනලා, ඉඳිකටුවෙන් රටා මහන මිනිස්සු
  • කතුරු කැරැල්ල භාරව ඉන්න සෙකුරිටිගාඩ්වරු
  • ආයකටු කැරැල්ලෙන් එක එක අරන් පොඩි එවුන්ගේ නැපිය හදන අම්මලා
  • ලණු කැරැල්ල, කැරැල්ල අරන් තඩි කඹ අඹරන කොහු ලණු කර්මාන්තයේ යෙදිලා ඉන්න අය
  • කැරැල්ල දෙපයේ පටලාගෙන ගස් ගස්බඩගාන මිනිස්සු
කැරැල්ල අතනෑරපු මිනිස්සු තවත් ඉන්නවා නම් කොමන්ට් කරන්න බලන්න...


Monday, August 29, 2022

ලුණු the Salt


 

ලොකු ලුණු කැටයක තියෙන්නේ ද
තිරුවාණ, මැණික්, දියමන්ති වලට තියෙන
හැඩේට සමාන හැඩයක්. වෙනස ලුණු
පොඩිකර, කුඩුකර, පැකැට්කර
සිල්ලර කඩේ විකිණෙන්නේ...
"කෑම රසකරන්න".

Friday, August 19, 2022

තාත්තාගේ තෑග්ග

 

"මිස්ට සේරසිංහ, අපේ පුතාට හොඳ ස්පෝර්ට්ස් ෂූ පෙයාර් එකක් ගන්න ඕනේ..."


ස්ටූලයකට බර දී ගෙන අලස මහවීදිය දිහා ඔහේ බලමින් උන් අපේ පාළුව බිඳිමින් තාත්තයි, මුහුණ පුරා සිනා පිරි පුතයි ෂෝ රූම් එකට ඇතුල් වුණේ...


වහ වහා අපි තීදෙනාම ස්පෝර්ට්ස් ෂූ සෙක්ෂන් එකට පිය මැන්නෙමු.


"කීයක විතර පෙයාර් එකක් ද පුතේ..." මං ඇහුවා, පුතා තාත්තා දිහා බැලුවා...


"පුතා කැමති හොඳ ලේටස් ඩිසයින් පෙයාර් එකක්, ගාන ප්‍රශ්නයක් නැහැ, කොලිටිය හොඳ නම්" ආදරණීය හිනාවක් පුරවා ගත් තාත්තා කිව්වේ, පුතාගේ මුහුණ සතුට තවත් වැඩි විය.


ස්ටෝරු කාමරයෙන් සපත්තු ජෝඩු කීපයක් අරන් ඇවිත්, පෙට්ටි වලින් ගලවා   පුතාට පෙන්වන අතර පෙට්ට්යේ අලවා ඇති ප්‍රයිස් ටැග් එක තාත්තාට පෙන්නු වෙමි. ඔහු ඔළුව වනා සන් කල පමණි.


පාට, ඩිසයින් අතර තනි වූ පුතා, සපත්තු ජෝඩු කීපයක් පැළඳ අඩි කීපයක් එහා මෙහා යමින් ෂෝ රූම් බිත්තියේ කණ්ණාඩිය ද තුටු සිනාවෙන් සරසන්නට විය. වරෙක බෑක් පැක් එක උරේ එල්ලාගෙන, තවත් විටෙක උඩින් දාගත් කමිසය හදමින් හැඩට පා ඔසවන පුතා... ඊට එහා ස්ටුලයකට බර දී හිඳිනා තාත්තා ද තම පුතු ගේ මුව සිනාවෙන් සතුටු වෙන හැටි... මාරුවෙන් මාරුවට දෙදෙනා දිහා බලන මට පෙනේ.


ඉඳහිට කෙනෙකු ආවොත් මිසක් මේ දවස්වල හරි හමන් බිස්නස් එකක් නොවිය.


විනාඩි විස්සක්, විසිපහක් විතර ගෙවූ පුතා සපත්තු ජෝඩු දෙකක් අතැතිව තාත්තා ළඟට දුව ආවේය.


"කොයික ද හොඳ?"


"පුතා කැමැති කොයික ද?"


පුතුගේ දෙනෙතු අත් දෙකේ ඇති සපත්තු ජෝඩු දෙක අතරෙ මාරුවෙන් මාරුවට දුවමින්, දකුණත පැත්තේ මොහොතක නතර විය.


"පුතා කැමැති කොයික ද" නිහඬතාවය බිඳිමින් තාත්තා ඇසුවේ හරිම ආදරයෙන්.


තාත්තාගේ කනට ලං වූ පුතා යමක් කියයි.


"කමක් නෑ පුතේ, ඔයාට හොඳම එක තෝරගන්න."


පුතුගේ තේරීම වුණේ මිලෙන් වැඩිම සපත්තු ජෝඩුවය.


"ඒකට මැච් වෙන සොක්ස් පෙයාර් එකකුත් තෝරාගන්න පුතේ..." කියූ තාත්තා ස්ටූලයෙන් හෙමිහිට නැගිට, මොහොතක් හිඳ සීරුවෙන් අඩිය දෙක තියා ඇවිදින්නට විය.


"මෙන්න මේකත් මට දෙන්න..." සේල් රබර් සෙරෙප්පු බාස්කට් එකෙන් ජෝඩුවක් තෝරාගෙන ඇවිත් මගේ අතට දුන්නා.


"මේක තාත්තට ද?"


"ඔව්, මට."


"අපි පොඩ්ඩක් මේක දාල බලමු නේහ්, මේ අයිටම් වල පොඩි පොඩි වෙනස්කම් තියෙනවා."


"නෑ, කමක් නැහැ, සයිස් එක හරි නෙහ්..."


මා පෙරැත්ත කළත්, පැළද සිටි සපත්තු ගලවා ඔහු තෝරාගත් සෙරෙප්පු ජෝඩුව පැළද බලන්න කැමැත්තක් දැක්වූයේ නැහැ. ඒ අයිටම් පොඩි පොඩි අඩුපාඩු ඇති නිසා සෑහෙන අඩු මුදලකට විකුණන්නේ, ඔහු තෝරාගත් සයිස් එකෙන් වඩාත් හොඳ ජෝඩුවක් තෝරා දී මා නිහඬ වූයෙමි.


පුතාගේ ස්පෝර්ට්ස් ෂූ ජෝඩුවට විශේෂ වට්ටමක් ලබා දී වෙනම බිලක් හදන්නට හිතාගත්තෙමි. 


"තාත්තේ, මම ටක් ගාලා ගිහින් CR පොත් තුනක් අරන් එන්න ද?" අසල ඇති පොත් කඩේට් යන්න පුතා සැරසෙයි...


"සල්ලි?"


"අර සල්ලි, මං ළඟ තියෙනවා නෙහ් තාත්තේ" කියමින් පුතා කුරුල්ලෙකු වගේ පිටත් විය.


පුතා නැති අතර වාරයේ දී අපි පොඩි කතාවකට වැටුණා. තාත්තා මීට පෙර කීපවරක්ම ෂෝ රූම් එකට ආව ගිය කෙනෙකි. ඒ හැම වාරයකදීම ස්පෝර්ට්ස් ෂූ සෙක්ෂන් එකට යන ඔහු සපත්තු හරවමින් මිල බලලා, කවදා ද සේල් තියෙන්නේ අහලා ගිය වාර එමට විය.


"මිස්ට සේරසිංහ අච්චර කියලත් මම රබර් සෙරෙප්පු දෙක දාලා බැලු නැහැ, තරහ වෙන්න එපා. සොරි."


"අපොයි, ඒක ප්‍රශ්නයක් නැහැ."


"මගේ සොක්ස් දෙක හොඳටම ඉරිලා, පුතා ඉස්සරහ ෂූස් ගැල්ල්ව්වොත් එයා ඒක දකීවි නෙහ්... ඒකයි වෙන එකක් නෙවෙයි..."


පුතා ආපසු එනවා පෙනේ...


පුතාගේ ආසාව වූ, වටිනා, මිලෙන් වැඩි ස්පෝර්ට්ස් ෂූ ජෝඩුවක් අරන් දුන් ඒ තාත්තා බිල ගෙවන්න දාහේ කොළ හා පන්සීයේ කොළ කීපයක් එන්විලොප් එකකින් අරන් ගැනපු විදිය මගේ සිතේ ෆ්ලෑෂ් විය...


සටහන: කොරෝනා කාලෙන් පසුව සිදුවූ, හිතවත් පාවහන් වෙළඳ සැලක කළමණාකරුවෙකුගේ අත්දැකීමක් මුල්කරගෙන, නම් වෙනස් කර ලියූ කෙටි කතාවකි. එය තාත්තා විසින් පොරොන්දුවක් ඉටුකිරීමක් විය.

Saturday, August 13, 2022

නුඹේ තනියට



නුඹේ තනියට
සොහොන් ගල මත
අරලිය මලක් සුවඳ දෙනවා
ජීවිතයේ කවදාවත් නොලද
සිහිල, පිනි කැට දෙනවා
යව්වනේ උගස් කල
ජීවිතේ තනිකල
කම්මලේ ඇසිඩ් සුවඳ
විඳ විඳ
ජීවිතේ මං එළිකළ
අක්කේ නුඹ
ඉක්මන් ගමනින් ගිහින්
නිසසල අරණේ
සැතපෙනවා...

Friday, July 29, 2022

මකුළුවාණෙනි සලාම්


 

මිලීනව, පිත්තලෙන් දිලුණ
වැඩක් නැති වෑල්වය
උඩ ලගින රෙගුලේටරය
හිස් සිලින්ඩරේ
වැඩ නැත
දොරමුල්ලේ...

අනේ මකුළුවෝ
උඹ මහසියෙන් වියන
රටා දාපු දැල
දුකයි මට
ආවේ නැද්ද හාමු
මෙතෙක් කාලෙට
නැහැනේ බිත්තර සුදු
මල්ල අහලක...

අද එනවලු
ගෑස් කඩේට
මං හොයනවා
ටෝකන් කෑල්ල
තුන් මසක් පරණ
නමා යටකර තියාපු
ලොකු කොලේ
නැහැ පේන්නට...

ඉතිං අවසරයි
උස්සන්නට සිලින්ඩරේ
පෑදුණොත් වාසනාව
කඳුළින් පිඹින
අවපැහැ නෙතු අගට
සිහිලක් දැනේවි
තව ටික දවසකට...

Monday, July 25, 2022

අලුගෝසුවා රජවුනේ, අපි තවම යුද බිමේ



පැන පැන උඩින්
දැවෙන කඳන් හංදියේ
යට කර මතක
ලොකු පුතු තරුණ සංදියේ...

ලෙලි තලන
කොහු, ලණු සුවඳ යටකර
තෙල් හඳුන්කූරු දැල්වලා
අපි පන්සලේ, පල්ලියේ
සෙත් පතා පූජා කෙළේ
දරුවන්ට යුද බිමේ...

මුනුබුරු මිණිබිරියන් මගේ
තවම නොනිමි අරගලේ
ඉල්ලමින් උන්ට ජීවිතේ
උදාවෙන හෙට දිනේ...

පොලු මුගුරු යකඩ පා
නුඹේ කොහොම ද එසවුණේ
යව්වනේ මල්කැකුළු පොඩි වුණේ
හැමදාම අලුගෝසුවා රජවුනේ
තොණ්ඩුවෙ මකුළු දැල්
ගිලටිනය සෙවණේ
සෙබළුනේ නුඹ අපි
තවම යුද බිමේ...

Sunday, July 17, 2022

උඩු යටිකුරු කර


 

ප්‍රිස්මයේ සිස්ටම්
බෙදුවේ
පාට පාටින්
හිරු එළිය
සුදු,
කවදා ද
උඩු යටිකුරු කර
ප්‍රිස්මයක්
යළි ගොඩනඟන්නේ
බලැති එළිය
සුදෝ සුදු...

Monday, July 4, 2022

වෙනසක් - The Change

 


බුර බුරා හැමුවා
දඟර පෑවා ගස් කරටි අඹරාගෙන
රළු රළ අරගෙන
වසා ගොඩකරය කරදියෙන්
නමක් අරගෙන
රුදුරු කුණාටුවක්...

උදා හිරු ලස්සන
නුඹත් තැන්පත්
හමන තාලෙට
ගහ කොළ නැළවෙන
මද පවනක්
සෙනේබර සුළඟක්...

සොබා මවුනි
පුරුදු වාරකන
නුහුරු කුණාටුවක්
කියා දෙන්නේ ද
වෙනසක
පාඩමක්...


නිමිත්ත: 2002 ජූලි 2-3 දිනවල දකුණු වෙරළේ ඇති වූ නුහුරු වාරකන් කුණාටුව හා මුහුද ගොඩගැලීම


Friday, July 1, 2022

කවුළුව - The Window


කවුළුව
වසා නැත
මම දකිමි
දුවන ලොව
ලොවේ දුවන
නුඹ
දුටු නුදුටු
මම
එනමුදු අප
අරන් දුවන
ලොව...

Friday, June 10, 2022

බාලගිරි - Not Today, Tomorrow

 


නුබ ගැබ බරව
හෝ ග ගා කඳුළු සලනවා
කෙසඟ කුරුදු දර පතුර
බෑ කිය කියා දැවෙනවා 
අතනෑර නුඹ
හති ද දා ගිනි පිඹිනවා
සිලින්ඩරය දොරකඩ
හැඩ ද දා මකුළුවා වියනවා...

මුළුතැන්ගෙයි රාක්කේ
බෝතල් විනිවිද පේනවා
පිළිකන්නේ පලා පාත්තිය
අහස බලාගෙන
නව දල්ලක් යදිනවා
ඇහැපියවෙද්දි හඹා එන
ගෑස් ලොරිය පේනවා
හතරට නැවුන ලොකු කොළය 
බාලගිරිය සොයනවා...

Tuesday, May 24, 2022

නිවටන (හල්කිරීම, පාපිල්ල නැති)

 



වාඩිවී උන්න
ගහ යට
කම්මැලිකමේ
ගහ සෙලෙව්වේ
එකමුතුවෙ බලේ
කූඩේ පුරවා ගත්තට
අහුලා ගෙඩි ඇපල් ගහේ
තොපි 
ලියනවා ද නියමයන්
වැළකුමට උඩුකුරු තෙරපුම
නොවළකා කාරණේ
පෙළන,
බලේ…

Thursday, May 19, 2022

දුරලන්නට අඳුර

 


අඳුර තීව්‍රය
වේදනාව නිම් නැත
රාත්‍රිය දිගුය
අරුණෝදය උදාවෙනතුරු
නොනිමී 
දැල්වේවා
විලක්කු,
ඉටි පහන්…

Sunday, April 24, 2022

දඬු අඬුව හිර කරන - The Grip

 

බොරු හකු 
වසන් කරන'මුත් 
රළු කැලැල්
පළුදු කඩතොලු
වරින් වර
හිර කරන
මිටිපහරින් පෙලන  
හකු අතර
දඬු අඬුවේ
ග්‍රහණයෙන් මිදෙන්නේ
නිමාවෙන කැටයම
නොවෙද වටිනා…

Friday, April 22, 2022

අරගල විරුවනි ඉවසන්

 


අඳුර පරදන
තරු කැට දිළෙන්නේ
උනුන්ගේම පුංචි එළියෙන්
දිරියෙන්
මිස නොව
ඔද තෙදැති හිරු රැස් අරගෙන
මෝදුවෙන මුවාවෙන
සඳ මෙන්
කඩා වැටෙන
දවා වනසන උල්කාපාත
නොමවන්
අපේ රට රකින
දූ දරුවනි අරගල විරුවන් 
රන්වන් තරු මෙන්
පුංචි පුංචි එළියෙන්
එක්වන්
ජයගනු සැක නැත
පලවා අඳුර
පතුරා සාමය සෙනෙහස
එකාමෙන්
පෙරටම යමු, යමු
ඉවසන්
පරදා විසගෝර
මෘගයන්...

Thursday, April 14, 2022

අපිට ඕනේ හෙටක්!


පාලකයා හැමදාම කලේ බොරුව
ඇම දාලා බාගත්තේ අහිංසකයිනගේ ඔළුව

කොහොම හරි කොටවලා බේදකරලා 
පුරවා ගන්නේ උන්ගේ චන්ද මල්ල
අරං බලය රකින්නේ උන්ගේම නඩය
ඉන්නකම් බලයේ හොරා කකා කරන්නෙම බොරුව
උනුන් අතරේම බෙදාගන්නවා ජාතික ධනය
ඔක්කොම බර පටවන්නේ මහජනයා පිටම
උන් එපාවීගෙන එනකොට
තව රොත්තක් වලිකනවා 
තවත් පොටක් පාදාගෙන
ලොකු, ලොකු බලාපොරෝත්තු ඇති කරනවා

පාලකයා හැමදාම කලේ බොරුව
ඇම දාලා බාගත්තේ අහිංසකයිනගේ ඔළුව

ආයෙත් තවත් බොරුවක් ජය ගන්නවා
උනුත් කරන්නේ එකම ප්රෝඩාව 
සාක්කු පුරවාගෙන උන් යන්නට යනවා
පරණ හොරා අලුත් වෙලා ආපහු එනවා
මාරුවෙන් මාරුවට උන් අපිව හොරා කනවා

පාලකයා හැමදාම කලේ බොරුව
ඇම දාලා බාගත්තේ අහිංසකයිනගේ ඔළුව

අම්මේ තත්තේ, නැන්දා මාමේ,
අයියේ අක්කේ, නංගි  මල්ලි 
අපි හැමදාම රැවටෙනවා
උන් හැමදාම රජවෙනවා
අපි පල්ලෙන් පල්ලට වැටෙනවා
තව කොච්චර කාලයක් රැවටෙනවා ද?

පාලකයා හැමදාම කලේ බොරුව
ඇම දාලා බාගත්තේ අහිංසකයිනගේ ඔළුව

අපිට ඕනෙ අපේ  අනාගතය
නිදහස, ජීවිතය
තවත් පල්වෙන්න බැහැ එක තැන
බැහැ, බැහැ හැමදාම රැවටෙන්න
අපිට ඕනේ හෙටක්
විස්වාසයක් ඇති හෙටක්
අලුත් යුගයක්...
එන්න එක්වෙන්න දිනාගන්න 
ලස්සන රටක්...

එපා එපා තුවක්කු මුණිස්සම්
නැතුව බියක් සැකක් අත්වැල් බැදගෙන
අරගෙන රෝසමලක්
එකතුව පුංචි, පුංචි වතුර පොදක් ලෙස
ගලන්නටවි ජන ගඟක්
ආදරයෙන්, සෙනෙහසින්, සාමයෙන්
වෙනස් කරන අරගලයක්...
ඉටුකරන්නට ජාතික වගකීමක්...
දිනවමු
අපේ රට, අපේ ලක්මව සෙනෙහසින්...
අපිට ඕනේ  හෙටක්!

Friday, March 25, 2022

බලාපොරොත්තුව - The Hope

 


සඳ සැඟවිලා අඳුර ගිලගෙන අහස
දින ගනිනවා ඇති පිළිගන්නට
නව සඳ, මුදු රැස්
අඳුර වෙලාගෙන ගොඩකරය
බලසුන්ව සැර රැහැන්
අරපිරිමහන්න විදුලි බලය 
බිඳුණ සුදු පෙණ අතුරා
ඔබ මොබ දුවන කඩිසර රළ
සරසයි දියඹ
තැන තැන විසිරුන පහන් එළි
පාවෙන යාත්‍රා
හැඩ කරන අඳුරු සිත්තම...

සාගර නීතිය රජයන
තෙරක් නැති සයුර
නොවී සැර පරුෂ
සපුරනවා ඇති බලාපොරොත්තුව,
දවසේ මඩිය...
එහෙත්
සයුරින් වට ගොඩකරය
මිදෙන්නේ කවදා ද
සාගර නීතියෙන්,
අඳුරෙන්...

Wednesday, March 16, 2022

කෝච්චියේ දිරන


 

හෝ හෝ හඬ මැඩගෙන
සමුද්‍ර දේවිය
බලා නොබලා මහ සයුර
අඳුර කපාගෙන ඇදෙනවා...

කොටුපවුරේ ඔරලෝසුව
මද එළියේ තනිවෙලා
විඩාබරව නැවතිලා,
ඒත් පුරුද්දට බලනවා...

අන්තිම බස්රිය පණ ගැහිගැහී
මග බලා ඉන්නවා,
විදුලි පන්දම් එළිය
අඩි පාර දිගේ පිය මනිනවා,
අපේ ගෙදර සඳ රැසින් දිලෙනවා...

පිනි දියෙන් නැහැවුණ බස්රිය
දවසේ විරාමය නිමා කර
හිරුටත් කලින් නගරෙට ඇදෙනවා,
හිමිදිරි අඳුරේම සමුද්‍ර දේවිය
කොළඹ දුවනවා...

ගමට වැටෙන හිරු කිරණ
අකැප ද තාත්තේ
නුඹේ ජීවිතය කෝච්චියේම
දිරෙනවා...

සමුද්‍ර දේවි: වෙරළබඩ දිනපතා කාර්යාල දුම්රිය

Saturday, March 5, 2022

ගිජුලිහිණියනේ වරෙව් පහතට - Come Down Vultures

 


ගිජුලිහිණියනේ
වරෙව් පහතට බැස අහස් විමානයෙන්
කුරුලු ඇසෙන් දකින දසුන
මුළා කරනවා ඇත තොප...
සංගීත රාවය වීදියේ කෙළවර
සතුටු සාදයක් නොව 
පාළුව දුක තුනී කෙරුමට මිස
වරුගණන් උන් ඉන්නා පෝලිමේ...
සරසා මල් වෙඩි බෙදා කිරිබත
සැමරුව හන්දියේ
උන් අද පෝලිමේ 
ජීවිත ජීවත් කෙරුමට අරගලේ
දුවනවා පෝලිමෙන් පෝලිමට
නිනව්වක් නැති දේශයේ…
ගිජුලිහිණියනේ
වරෙව් පහතට,
බැස අහස් විමානයෙන්...

Saturday, February 26, 2022

පැවැත්ම - Survival


ගවයින් වටා ද
සුදු කොක්කු
ගැවසෙති 
පැවැත්ම උදෙසා...

Thursday, February 17, 2022

නොදනිමි...

 


ඈත අහස නැමී පහළ
සුවිසල් සයුර සිඹින
සිතිජ ඉමේ නිසසල
එද්දි වෙරළට රළ පෙළ
වියරු වෙන්නේ කෝමද...

පාට පාට මල් පෙති
සමනොළ තටු පිරිමැද
හමන මුදු මද නල
අතු ඉති රිකිලි සිඳින්නට 
නපුරු වෙන්නේ කෝමද...

සුන්දර සිනහව ලාලිත කතාව
සැණෙකින් යට කර
රුදුරු කේන්තිය
මතු වෙන්නේ කොයින් කෝමද,
නොදනිමි...