මූ-ලෝ-උපාය - Strategy

 

නඟේ උඹේ දහඩිය මහන්සිය

නැව් නැග්ගේ

ගෙනෙමින් රන් කහවණු

දේශයට

රට කරන මොළ ම හාන්සිය

නැව් නග්ගන්න

මහන කම්මලයි උඹයි

විදේශයට

උගස් කරන්න

ලේසි ඇති උන්ට

හිස් දේශය...

වට වට - Circles

 

වට, වට අඳින

කව කටුව

හිත, හිත ඇතිනම්

දිගෑරිය හැකිය

තුඩ, තුඩ ඇඟිලි

හසුරු වන

කව, කව පැහැ

ළා තද විය හැකිය

එක,  එක මත

වැටි නොවැටෙන

නෙක, නෙක සදතෑකි

හැඩ දිලෙන

සමවාය

බැබළෙන...

සටහන:

ජ්‍යාමිතිය අනුව වට, කවය, වෘත්තය කොහොම කිව්වත් circle, මිනිස් සමාජයේ ද කවයන් ඕනෑ තරම්ය.  කවයන් හැටියට ඒකරාශී වෙන තැන සම හෝ ආසන්න වශයෙන් සම අදහස්, සිතුම් පැතුම්, රුචියන් තිබිය හැකිය, ඒ වගේම වෙනස් කවයන් දෙකක වුණත් සමාන අදහස් දරන කොටස් සිටිය හැකිය.  ජ්‍යාමිතිය අනුව කවයන් කීපයක් එක මත එක සමව හෝ අසමව වැටීමෙන් ඇති වෙන්නේ, සමවාය; එහෙමත් නැතිනම් ඒ කවයන්හි පොදු තැන ඒක union හැටියට කියන්නේ. වට, වට වටා ඒකරාශී වුණත්, ඉන් මතුවෙන පොදුතාවය, ජ්‍යාමිතිකව ඇති කරන අලංකාරය අලුත් රූප මවන්න පුළුවන් නේද? එහෙමනම්, සමාජයේ...

ක්ෂිතිජ ඉම - The Horizon

 

ඈත සයුරේ

අහස කරදිය සිඹින්නේ

විඩාබර හිරු

කිරණින් දවස'ග පාට කරන්නේ

පන්හිඳ හබල

ක්ෂිතිජ ඉමය සොයන්නේ

කුරුලු රෑන

ගී ගයමින් තටු සලන්නේ

සැහැල්ලුවෙන් උන්

කොහෙදැයි මේ ඇදෙන්නේ

ක්ෂිතිජ ඉම ද

සොයන්නේ...

සින්දූර ගස | The Oak Tree

 

හැමුවා මහා කුණාටුවක්

රැයේ පටන් දවස පුරාම

උදුරාගෙන ගියා ගසේ කොළ

ලොකු අත්තකුත් බිඳගෙන කඳෙන්

සින්දූර ගස පෙළා හෙම්බත් කර

එනමුදු,

සින්දූර ගස දරා සිටියා

අවට ගස් උදුරා වැටෙද්දි බිම

වෙහෙසට පත්වූ සුළඟ

ලං වෙලා විමසුවා හෙමිහිට

සින්දූර ගසේ, කොහොමද නුඹ

නොවැටී ඉන්නේ කෙළින්, තවම

සින්දූර ගස තැන්පත්ව කියා සිටියා,

සුළඟේ, මම දනිමි නුඹට පුළුවන

අතු ඉති මගේ සිඳ බිඳ දමන්නට

ගසාගෙන යන්නට කොළ ඉවතට

රිදවන්න මගේ කඳ, අඹරන්න

එනමුත්,

මට ඇත මුල් පස තුළටම විහිඳුන

උපන් දා සිට දින දින සවියෙන් වැඩෙන

දුටුව ද නුඹ, පුළුවනි ද අත තියන්න

එයයි මගේ සවිය, බලවත්

අද වෙනතුරු,

දැන සිටියේ නැහැ නෙව

මෙතරම් ඔරොත්තු දිය හැකි ද මට

තුතිය නුඹට,

අද දැනගත්තෙමි

කෙතරම් ශක්තිමත්ද මා

* ඇමෙරිකානු ජාතික, Johnny Ray Ryder Jr. කවියාගේ "The Oak Tree" නිර්මාණයේ පරිවර්තනයකි.

* ඕක් ගස හැඳින්වීමට වැඩියේ භාවිතා නොවන සින්දූර ගස කියන සිංහල යෙදුම පාවිච්චි කරා. ඕක් ගස විහිදුන අතු, පිරි කොළ වලින් අලංකරය වගේම නුවණ, ශක්තිය හා ඔරොත්තුදීමේ සංකේතය හැටියට ගැනේ.

* සින්දූර ගස අපිට ලොකු පාඩමක් කියාදෙනවා නේද?

පරිවර්තනය: එම්. ඩීන්, ගල්මල්-Coral