අසරණව | Broken

 

පාටකූරු පෙට්ටිය අරගෙන

රූප පොත පෙරළාගෙන

පොඩි පුතු විමසයි

රූපෙට දියයුතු පාට...

චොකලට් කෑල්ල චොකලට් දුඹුරුය

ස්ට්‍රෝබෙරි ගෙඩිය ස්ට්‍රෝබෙරි රතුපාටය

බ්ලූබෙරි නම් දම්පාටය

දොඩම් ගෙඩිය අපේ කොළපාටය

රට ඒවා ඔරේන්ජ් පාටයි

නෙව පුතේ...

පාටකූරු කෑලි තෝරන පොඩ්ඩා

නහය ඇඹුල් කරගෙන අතරමංව!

චොකලට් පෙත්තක, රස පළතුර

මතක නැද්ද පුතේ?

දුක හිතුණා...

රුපියල සරුංගෝලය

රුකුල් දි දී අහසේ නැගලා

වරල් සල සලා ඔහේ පාවෙනවා

කඩ රාක්ක උසින් උසය 

අපි කුරු මිනිසුන් කරලා

සුරංගන කතා කියන පාලකයා

පඩිපත හූරනවා...

English version: Broken

වැසි දිය බිඳිති - Rain Droplets

 

හතර වටින් කළු කරගෙන

වැහි වලාවක් ඇදුණා

කුරුලු රෑන විග විගහට

කූඩු කරා තටු සැලුවා...

දළුකොළ පොහොට්ටු නොරිදවා

හීන් පොදක් හෙමිහිට වැටුණා

වියළි පොළොව සතොසින් තෙමුණා

පළාතම සුවඳින් පිරුණා

උඩින් උඩින් එල්ලීගෙන දුවනා

කණුවෙන් කණුව හිරවි ඇදෙනා

විදුලි රැහන් පොද වැස්සේ

ඔහේ තෙමුණා

පුංචි පුංචි දිය බිඳු සැදී

කළු රැහැන් දිගේ මුතුපෙළක්!

එල්ලීගෙන සීරුවෙන් යටිකුරුව 

කණු දෙපසින් පල්ලම් බහිනා

දෙපසින් එන අතරමං කුහුඹුවන් විලස

හැපි උරෙන් උර තුටිනා

ලංවි කියන්නේ රහසක් දෝ

රැහැනින් සමුගෙන මිදෙනා

වැස්ස සෙමින් මෝරනවා

මුතුකැට ටික ටික ලොකු වෙනවා

රැහැන් දිගේ කඩිමුඩියේ ඇදෙනා

ගමන ටික ටික කෙටි වෙනවා

විනිවිඳ පෙනෙන දියබිඳු අඳුරේ

බර වැඩි වුණි ද තරම ලොකුවි

කඩා හැලෙනවා ගමන මගදී

නිති අනිති රැඟුම විදහා