Saturday, December 30, 2023

ඇල්ම | Affection (ශනිදා දහයට!)

 


අයෙකු ගැන
ඇලුම් හිතක් පහල වෙන්න විනාඩියක් ඇති,
කැමත්ත ඇති වෙන්න පැයක්,
සෙනෙහසක් ඇති වෙන්න දවසක්,
එනමුත්,
අමතක කරන්න ජීවිත කාලයක්...


උපුටා ගැනීම: අන්තර්ජාලයෙන් (කතෘ: Kahlil Gibran)
පරිවර්තනය: එම්. ඩීන්, ගල්මල්-Coral

සටහන: Crush කියන එක බලවත් ස්නේහය කියන අරුත දෙන නමුත් ඒක පාර්ශ්වික අදහස, ගැලීම හා තීව්‍රතාවය මතුකරන්න ඇල්ම වචනය තෝරාගත්තා.

Saturday, December 23, 2023

ඔබට පෙම් කරමි | I will Love You (ශනිදා දහයට!)

 


මා ඔබට පෙම් කරමි
හිරු දවනතුරු ආකාහේ,
සඳ දිළෙනතුරු
අඳුරු රාත්‍රියේ.
රුදුරු නිල් සයුර
නිසසල වෙනතුරු සිඳී,
මා ඔබට පෙම්කරමි
කාලය ගෙවෙනතුරු.


උපුටා ගැනීම: අන්තර්ජාලයෙන් (කතෘ: Christy Ann Marine)
පරිවර්තනය: එම්. ඩීන්, ගල්මල්-Coral

Saturday, December 9, 2023

ඔබමය ප්රදීපාගාරය කුණාටුව | Light House and Storm (ශනිදා දහයට!)

 


කලහලකාරි රළු සිතුවිලි
ඔබේ සිත් වෙරළ පෙලද්දි
එපා බියවෙන්න, ඔබමය ඔබේ
ප්‍රදීපාගාරය, කුණාටුව එකලෙස

එපා මුදාහරින්න, දැඩිව අල්ලාගන්න
රළු, මොර දෙන කුණාටුව
මෙල්ලකරන්න, හිතැඟි ලෙස
තෝරාගන්න, අවදිකරන්න ඔබේ හඬ 
පතුරවා අණසක "සාමකාමීව, තැන්පත්ව"


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: John Mark Green)
පරිවර්තනය: එම්. ඩීන්, ගල්මල්-Coral

Saturday, December 2, 2023

ඩී.ඊ.එම්. ඕ'ක්‍රසි මලාය (ශනිදා දහයට!)


අරගලය කියන යෙදුම මිනිසා ලොව උපන්දා සිට හුස්ම ඉහළ පහළ ගැනීම, හෙලීම තරම් පොදු දෙයකි. මනුසතා තම පැවැත්ම, ආරක්ෂාව වෙනුවෙන් බාහිර සමාජය සමඟ ද අනෙකුත් සත්වයින් සමඟ ද යෙදෙන අරගලය වගේම තම වටාපිටාව පරිසරයේ අනේක අබ්බැහි, ආකර්ශණ, නොමඟ යෑම් වලින් මිදීමට තමා තම සිත සමඟ යෙදෙන අරගලය ද සුළුපටු නොවේ. අරගලය මොනාකාර වුවද විශ්ව සාහිත්‍යය කෙරෙහි අරගලය ලබා දෙන නිමිති, මූලයන් අපමණය. කාව්‍ය  සාහිත්‍යයේ අදටත් තැනක් හිමි සූෆි කාව්‍ය සීරුවෙන් හසුකරගන්නේ පුද්ගලයා තම සිත සමඟ කරන අරගලය නොවෙද?

සමාජ දේශපාලන පෙලීම හා පීඩා අරගලයන් වලට ඉන්දන සපයන අතර, ප්‍රතිරෝධය මැඩලීම අරගලයන් පෝෂණය කරනවා වගේම නිර්මාණකරනයට ද උත්තේජනය සපයයි කියන්න පුළුවනි. මේ එක් උදාහරණයකි, 70 දශකයේ වූවා කියන සිද්ධියකි.

70 දශකයේ මැද භාගයේ දී, මෙරට ඉංග්‍රීසි පුවත්පතක අපූරු මරණ දැන්වීමක් පළ වුණි. එහි දැක්වුණු අන්දමට මියගිය පුද්ගලයා ඩී.ඊ.එම්. ඕ ක්රසි නමැති මහතෙකි. ඔහුගේ මරණයෙන් ශෝක වන්නන් අතර, ටී. රූත් (භාර්යාව), එල්.අයි. බර්ටි (පුතා) සහ ෆේත්, හෝප් සහ ජස්ටිස් නමැති සොහොයුරෝ ද වූහ. ලිපිනය ලෙස සඳහන්ව තිබුණේ අරලිය මැඳුර, පණගියවත්ත, අඳුරුවෙල යනුවෙනි.

බැලූ බැල්මටම මෙහි අමුත්තක් නොතිබුණ ද, ටික දවසකින්ම එහි සැඟවී තිබූ කර්කශ සරදම හෙළි වුණි. මියගොස් තිබෙන්නේ “ඩිමොක්රසි” නොහොත් ප්‍රජාතන්ත්‍රවාදයය. ශෝකවන පිරිසට සත්‍යය (Truth), නිදහස (Liberty), විශ්වාසය, බලාපොරොත්තුව හා යුක්තිය (Faith, Hope, Justice) අයත්ය.

මේ කාලයේ මෙරට පැවතියේ ද, පුවත්පත් ආයතන මර්දනය, විපක්ෂ රුස්වීම් තහනම වැනි ප්‍රජාතන්ත්‍ර විරෝධී දේශපාලන ක්‍රියාවලියකි. අර සිනා උපදවන මරණ දැන්වීම, ඊට සිය විරෝධය දක්වනු පිණිස, නිර්මාණශීලී පාඨකයකු විසින් කරන ලද්දකි (ඔහු වෘත්තියෙන් වෛද්යවරයෙකි).

මෙම මරණ දැන්වීම පුවත් පතේ පලවූ දා උදයේම එය එවකට පැවැති රජයේ ප්‍රබල ඇමැතිවරයෙකුගේ නෙත ගැටුන බවත්, වහාම ඔහු ආරක්ෂක අංශය අරකී මැදුරට යවා එහි විසූ අයගේ වතගොත සොයා බැලීමට තරම් කලබල වූ බව පුවත්පත් වලින් කියවා ඇත්තෙමි. එතැන් පටන් එය ලියුවා යැයි සැක කර ප්‍රගතිශීලී ලේඛකයින්, මාධ්‍යවේදීන් බොහෝ දෙනෙකුට අනේක පීඩා හා හිරිහැර සිදු වූ බව කියවෙයි. පසුව නිර්මාණය කල වෘත්තීය වෛද්‍යවරයා ස්වේච්ඡාවෙන් ඉදිරිපත් වූ බව කියවේ.

තවද, මෙකී මරණ දැන්වීම 70 දශකයේ තරුණ කැරැල්ලක රහස සංඥාවක් නිකුත් කිරීමට යොදාගත් එකක් බව ද ප්‍රකට කතාවක්  විය.

මේ දැන්වීම පිළිබඳ කතාව, ඉන්දියාවට ද පැතිරුණි. ඒ කාලයේ ඉන්දියාවේ අගමැතිනිය ඉන්දිරා ගාන්ධිය. එහිද ලංකාවට සමානවම මාධ්‍ය හා විපක්ෂය මර්දනය කිරීම සිදුවෙමින් පැවතුණි.

1975 ජූනි මාසයේ, “ටයිම්ස් ඔෆ් ඉන්ඩියා” පුවත්පතක අවමංගල්‍ය දැන්වීම් තීරයෙහි, “ඩි ඕක්රසි, ඩී.එම්.ඕ.” නමැති මහතකුගේ මරණය ගැන නිවේදනයක් පළ වුණි. ශෝක වන්නෝ ද ලංකාවේ දැන්වීමේ පරිදිමය. පසුව දැනගන්නට ලැබුණු අන්දමට, අපේ දැන්වීම අනුකරණය කරමින් එය පළ කර තිබුණේ, පසුකලෙක “රීඩර්ස් ඩයිජස්ට්” සඟරාවේ ඉන්දියානු මුද්රණයේ නියෝජ්‍ය සංස්කාරකවරයා ලෙස කටයුතු කළ අශෝක් මහදේවන්ය.


ps:

එකී මරණ දැන්වීම මෙසේ පලවූ බව කියවේ:

D.E.M. O’ Cracy, beloved husband of Truth, loving father of L I Bertie, brother of Faith, Hope and Justia, interned on Saturday 20th instant, Araliya Medura, Panagiyawatte, Anduruwella

Dr. Riley Fernando ගේ නිර්මාණයක් බව කියවේ.

Saturday, November 25, 2023

ටෙලිග්‍රෑම් | Telegram (ශනිදා දහයට!)

 




අද ටෙලිග්‍රෑම් කියන විට මුලින්ම හිතට එන්නේ තවත් එක්, එසැණින් පණිවුඩ හුවමාරු කරගත හැකි එහෙමත් නැතිනම්  instant messaging App එකක් හැටියට. ලොව ප්‍රචලිත Facebook Messenger, WhatsApp, Instagram, Twitter, WeChat, Skype වැනි සේවාවන්ට විකල්පයක් හැටියට රුසියානු ජාතික Pavel Durov, Nikolai Durov සොහොයුරන් දෙදෙනෙකුගේ හඳුන්වාදීමක් හැටියට 2013 වසරේ දී එළිදැක්වෙන Telegram සේවය අද සෝෂල් මීඩියා අඹරේ දිලෙයි.

එනමුත් ටෙලිග්‍රෑම් හෙවත් විදුලි පණිවුඩ සේවාව කියන්නේ ලංකාවේ ඕනෑම අස්සක් මුල්ලක් නෑර හදිසි පණිවුඩයක් රැගෙන ගිය සේවාවක් බව ඔබ දන්නවාද? ලංකාවේ ටෙලිග්‍රෑම් සේවාව 1858 වසරේ දී ආරම්බ කර ඇත්තේ කොළඹ හා ගාල්ල අතර පණිවුඩයක් ගෙන යමින්.

ලොව සම්ප්‍රදායීක ටෙලිග්‍රෑම් සංනිවේදනයේ ආරම්බය 18වන ශතවර්ෂය තරම් ඈත කාලය දක්වා දිවෙයි, එය ප්‍රංශ ජාතික Claude Chappe ගේ සොයා ගැනීමකි. එය මුලින්ම යුරෝපයේ ප්‍රංශ ආධිපත්‍යය පැවැති පෙදෙස්වල බාවිතා වූ බව කියැවේ. ටෙලිග්‍රෑම් සංනිවේදනයේ දී දුරකතන පහසුකම් හරහා කියවනු/දෙනු ලබන පණිවුඩය අනෙක් පස ඉන්නා වූ ටෙලිග්‍රාෆ් ඔපරේටර් කෙනෙකු විසින් අතින් සටහන් කරගෙන නියමිත පාර්ශවය (recipient/ප්‍රතිග්‍රාහකයා) වෙත බෙදාහැරීමට යොමු කරයි. සාමාන්‍යයෙන් ටෙලිග්‍රෑම් සේවාව තැපැල් හා දුරකතන/විදුලි සංදේශ පහසුකම් සපයන රජයේ සේවාවක් හැටියට ලොව පුරා ක්‍රියාත්මක විය. අද මෙන් පණිවුඩ හුවමාරු තාක්ෂණය හිනිපෙත්තේ නොවූ අතීතයේ ටෙලිග්‍රෑම් සේවාව නැතුවම බැරි තවත් එක් සේවාවක් විය.

ලංකාවේ ටෙලිග්‍රෑම් හෙවත් විදුලි පුවත් සේවාව තැපල් සේවයට අනුබද්ධ සේවාවක් විය. ඕනෑම තැපැල්, උපතැපල් කාර්යාලයකින් පහසුවෙන් ලබාගත හැකි ෆෝරමයක අතින් ලියා ඉදිරිපත් කරන පණිවුඩය, දුරකතනය ඔස්සේ පණිවුඩය බෙදාහැරිය යුතු අන්තය දක්වා විකාශණය (transmit) කෙරේ. බොහෝ විට තැපැල් කාර්යාල දෙකක් හෝ ඊට වැඩි ගනනාවක් එම හුවමාරුවට සම්බන්ද වෙන අතර ලියුම් බෙදන  ක්‍රමයට නියමිත පුද්ගලයාගේ ලිපිනයට විදුලි පුවත (ටෙලිග්‍රෑමය) බෙදා හරී. විදුලි පුවත් සේවයට අය කරනුයේ පණිවුඩයේ ඇති වචන ගනන අනුවය, එහෙත් සාධාරණ අයකිරීමක් තිබූ සේවාවකි. 

ලංකාවේ මොබයිල් ෆෝන් මෙතරම් ප්‍රචලිතවීමට පෙර යුගයේ හදිස්සියේ අඳුරු වැටුන වෙලාවක තැපැල් මහත්තයාගේ සීනු හඬ ඇහෙනවා නම් එය බොහෝ විට නරක ආරංචියක් රැගෙන එන ටෙලිග්‍රෑමයක් වෙන්න පුලුවන් ඉඩකඩ වැඩිවිය. මඟුල් ගෙදරක වුනත් සහබාගීවීමට නොහැකියාව ප්‍රකාශකරමින් ලැබෙන ටෙලිග්‍රෑම් තිබුණි. හදිස්සියේ සේවා ස්ථානයට වාර්තා කරන්න බැරිවීම දන්වන්වන්න, හදිසි නිවාඩුවක් ලබාගන්න ටෙලිග්‍රෑමයක් නැතිවම බැරි සේවාවක් විය.

ඒ වගේම ටෙලිග්‍රෑම් නිසා සිදුවෙන අකලංචි නැතිවා නොවේ, මේ එවැන්නක් ගැන කතාවක්:

ඉහළ අධ්‍යාපන ආයතනයක සිසු පිරිසක් විනෝද ගමනක් යොදාගත්තේ ඔවුන්ගේ නිවාඩු කාලයක. අද වගේ හැමෝම අතේ කැමරා නැති ඒ කාලයේ කැමරාව ගෙන එන්න මතක් කරන අදහසින් ඔවුන් දුර බැහැරක සිටි මිතුරාට ටෙලිග්‍රෑමයක් යැව්වා. එය  ගෙදරට ආ වේලේ ඔහු ගෙදර නොවිය, ටෙලිග්‍රෑමය ඔහුගේ පියා අතට පත්විය. එය කඩා කියවූ තාත්තා පුතාට ගමන තහනම් කලේය. එකඟ වූ පරිදි කැමරාව ගෙනාපු නැති එක හා චාරිකාවට සහබාගී නොවීම ගැන මිතුරන් ඔහුට දොස් කියන්නට විය. ඔහු ටෙලිග්‍රෑමය පෙන්වන්නට විය.

වරද්දන්නේ නැතිව කමලාවත් අරන් වරෙන් යැයි එහි සඳහන් විය.  කාටත් වරද පැහදිලි විය. ටෙලිග්‍රෑමය සටහන් කරගනිද්දි ඔපරේටර් විසින් කැමරාවත් කියන පද කමලාවත් කියා සටහන් වීම කල හදිය නිසා තම පියා තමන්ව අවිශ්වාස කරබවත් කෙතෙක් පැහැදිලි කරත් ඔහුට ඒත්තු ගන්වන්න බැරි වූ බවත් බොහෝ අසරණව කියන්නට විය.

කෙසේ නමුත් වසර 155ක් සමාජ මෙහෙවරක් ඉටු කර ලංකා ටෙලිග්‍රෑම් සේවාව 2013 ඔක්තෝබරයේ සිට අත් හිටුවන බව අදාල අමාත්‍යාංශ දැනුම් දුන්නා ඊට මාස කීපයකට කලින්.


Pic curtsy Sunday Observer


Saturday, November 18, 2023

සාගර දියක ලුණු | The Salt (ශනිදා දහයට!)

 


සැඳෑ අහසේ මලානික හිරු
නෙක රටා මවනා වළාකුළු
ඈත දියඹෙන් ලහි ලහියේ
පෙරලන් එන දිලෙන රැලි...

හමුවෙලා දෝ
අහස නැමී සයුරට
ඈත,
ඈත සිතිජයේ...

සත්තයි, අසාවි
සාගර දිය ඇයි මෙතරම් කඨෝර
කොහෙන් දෝ මෙතරම් ලුණු,
අපුල කරන් නහය...

යටපත් කරන්න නොහැකිව
රහසේ රූටා වැටෙන
කඳුලේ,
නිම් නැති බර උරලන
හෙම්බත්ව වැගිරෙන
දහඩියේ
ලුණු...

අනේක දුක දරන
ලය නොපලා නික්මෙන
හිස් සෝ සුසුමෙ
කොහේ ද සුගඳ...

උන් දනීද එ'වග
හැමදාම
පාට පාටින් අඳින්නෙම
සිතිජය... 


Tuesday, November 14, 2023

සුවපත්වීම | Healing

 


මෙලෝකයේ  වරක්වත් ශාරීරිකව තැලිච්ච පොඩිවෙච්ච, හිත රිදිච්ච වැටිච්ච, කොන්වෙච්ච පෙලිච්ච යනාදි නිරස සිද්ධීන්ගෙන් බැටකාපු නැති කෙනෙකු ඇත්නම් එය ඉතාම විරල වෙන්න පුලුවනි.

දුර ඈතක පියාසලා ආපසු කැදැල්ල කරා තටුසලන පුංචි කුරුල්ලෙකු පොඩි විරාමයකට නවතින ගසේ අත්ත කඩා වැටෙනවා. ඒ කම්පනයෙන් මිදී, තම කූඩුවකරා පියාඹන කුරුල්ලා හෙට දිනයේ උදේ නැවත කෑම සොයා පියාසර නොකරයි ද? තවත් අත්තක වහන්නේ නැතිවෙයි ද?

එය දහිරිය කියන්න පුලුවන්, ඒ වගේම කලින් වූ අබැද්දිය අමතක කර එදිනෙදා ජීවිතයට මුහුණදීම නොවෙද? එසේ නෙවෙන්න පුංචි කුරුල්ලාට සිද්ධ වෙන්නේ බියෙන් ගුලිගැහී තම කූඩුව තුල කොටුවීම නොවේ ද?

එමෙන්ම ශාරීරික වගේම මානසිකව සිදුවන තාඩන, පීඩන, වේදනා ආදියෙන් මිදී සුවපත්වීම අවශ්‍ය වන්නේය, එසේ නොවුනොත් අර ඇබැද්දීන් විසින් ජීවිතය වෙලාගෙන තව තවත් පීඩාවට පත්කරනවා ඇති.

සැම සිත් සුවපත් වේවා!


Saturday, November 11, 2023

මුදු වෙනු මැන | Be Soft (ශනිදා දහයට!)

 


ඔබව කඨෝරයෙකු කරන්න
ලොවට ඉඩ නොදෙන්න.
අනේක රිදුම් නිසා ඔබ,
ඔබව ප්‍රතික්ෂේප නොකරන්න.
අමිහිරි අත්දැකීම්,
කරුණාවන්ත ඔබ වෙලාගන්න ඉඩ නොහරින්න.
ආඩම්බර වෙන්න,
කවුරු එකඟ නොවුවද
ඔබ ඉන්න තැන සුන්දරය.


Iain S. Thomas කවියාගේ Be Soft කවියේ පරිවර්තනයකි.
පරිවර්තනය: එම්. ඩීන්, ගල්මල්-Coral

Saturday, November 4, 2023

සමාන බව | No Difference (ශනිදා දහයට!)

 


රටකජු ඇටයක් තරම් පුංචි
විසල් යෝධයෙකු වුව ද
අප සැම ලොකු කුඩා නොවෙන්නෙමු
අඳුරේ, වහන් කල විට එළිය
රජෙකු තරම් පොහොසත්
ගුල්ලෙකු තරම් දුප්පත් වුව ද
අප සැම වටී එක ලෙස
අඳුරේ, වහන් කල විට එළිය
රතු, කළු, රඹ,
කහ හෝ සුදු වුව ද
අප සැම දිස්වෙන්නේ එක ලෙස
අඳුරේ, වහන් කල විට එළිය
එනිසා, හැම දේම හරි ගස්සන්න
හරි මගට ගන්න
වහන් කලා ද එළිය (දෙවිඳුනේ)
ගිල්වා අප අඳුරේ?


උපුටා ගැනීම: අන්තර්ජාලයෙන් (කතෘ: Shel Silverstein)
පරිවර්තනය: එම්. ඩීන්, ගල්මල්-Coral

Wednesday, November 1, 2023

පුංචි සිනාවක් | Sunny Smile


 

පුංචිම පුංචි ප්‍රසන්න සිනාවක්,
අගේ නැතුව පිදුව,
එනමුත් උදා එළිය මෙනි
රෑ අඳුර පලවා හැරිය,
දවසම පුබුදු කර
ජීවිතයට වටිනාකමක් දුන්න.



නිර්මාණ ගෞරවය මුල් නිමාණකරුවන්ට හිමිවේ.


උපුටා ගැනීම: අන්තර්ජාලයෙන් (කතෘ: F. Scott Fitzgerald)
පරිවර්තනය: එම්. ඩීන්, ගල්මල්-Coral

Saturday, October 28, 2023

සිනාව ඔසුවකි! සිනාසෙන්න | Smile (ශනිදා දහයට!)


උදේ පාන්දර ඔබට උනුම උණු කෝපි කෝප්පයක් පිළිගන්වනවා, ලස්සන සිනාවක් එක්ක. පදමට රෝස්ට් කර කෝපියේ ඇරෝමාව (Aroma, සුවඳ) ඔබේ නාස් පුඩු අතරින් රිංගන්නට කලින්, කෝපි කෝප්පයෙන් රැළි කැරලි දාමින් මතුවෙලා උඩට පාවෙන උණුසුම් දුම ඉහළට ඇදෙද්දි, කෝපි උගුර තොලගාන තුරු නොඉවසිල්ලෙන් බලන් ඉන්න රසාංකුර පිනවන්න කලින් ඔබේ නෙතු යුග ග්‍රහණය කරගන්නේ මොනවද... ලස්සන සිනහව නේද? ඔබ පෙරළා පුදන පිළිතුරු සිනාව, නොකී දාහක් වදන් අරන් යන කවියක්, මියුරු ගීතයක්, සිග්නල් එකක් නොවේ ද? That's the magic.

සිනාසෙන්න, වැඩි වැඩියෙන් සිනාසෙන්න. සිනාව ඔසුවකි. ඔබ සිනාවක් පිරිනමන විට එය ලබන්නා පිළිතුරු සිනාවක්පායි. එය ලැබුවේ එක් කෙනෙකුට වැඩි පිරිසක් නම් ඔවුන් ද සැබැවින්ම සිනාසෙනවා ඇත.
පුංචි සිනාවක් මොළයට ලොකු කෙමිස්ට්‍රියකි (chemistry), ඒත් එය දැනගන්න ඔබ රසායන විද්‍යාඥයෙකු වෙන්න ඕනේම නැහැ. කෙනෙකු සිනාසෙන විට ප්‍රකෘතිමත් වෙන මොළයෙන් මුදාහරින ශ්‍රාවයන් නිසා ආතතිය/මානසික පීඩනය (stress) සමනය කරයි, වේදනාව නසයි (pain reliever) විෂාදනාශකය (antidepressant) හැටියට වැඩකරයි. ඒ වගේම හදගැස්ම (heart beat) හා රුධිර පීඩනය (blood pressure) පාලනය කරයි.
මිනිස් මුව වටා පිහිටා ඇති සියුමැලි මස්පිඩු විශේෂයක් සිනාවට සම්බන්ධය, ඒවා හකු වලට යා වෙලා තියෙන්නෙ. හිතක උපදින සිනහව කියන හැඟීම ස්නායූ මගින් ඒ මස්පිඩු වලට දැනුම් දෙනවා, ප්‍රතිඵලයක් හැටියට මුව දෙකොන ඉහළට ඇදෙනවා. සතුටක සේයාව මුහුණේ ඇඳෙනවා. ඒ සිනාව ඇත්තවශයෙන්ම, අව්‍යාජ නම් එම පුද්ගලයගේ සිත සතුටින් ප්‍රමෝදමත් වෙනවා, මුවමඩලේ ස්නායුවක් විසින් ඒ සුන්දර පණිවුඩය ඇස් වටා පිහිටි සුමුදු මස්පිඩු වෙත අරගෙන පිම්මේ දුවනවා. එහි ප්‍රතිඵලය සුන්දර ඇස්වටා ලස්සන රැළි මතුවෙනවා. අව්‍යාජ සිනාවක් මුවමඩල පුරා විසිරිලා ලස්සන ඇස් කොනින් ප්‍රකාශ වෙන්නේ එහෙමයි. තවද පුංචි සිනාවක් ඔබේ මුහුණ පුරා ඇඳෙන විට, මුහුණේ පිහිටි සියුම් පේශීන් ගණනාවක් ප්‍රබෝධමත් වේ, එහෙම නැතිනම් ව්‍යායාමයේ යෙදෙයි. ඉන් මුහුණේ ලස්සන, තරුණ පෙනුම රැකෙනවා. ඒ කොහොමද? ඒක රහසක්! හොඳට, ලස්සනට හිනාවෙලාම බලන්න...
සිනහව සුන්දරය, අයෙකු උත්පත්තියෙන් ලබන මිලකළ නොහැකි දායාදකි. එහෙත් සිනහව පෑම එහෙමත් නැතිනම් ප්‍රකාශ කිරීමේ කලාව පුද්ගලයාගෙන් පුද්ගලයාට වෙනස්ය. කෙනෙකු සතු, කොච්චර දුන්නත් අඩුවක් නොවන වස්තූන් මේ ලොවේ ඇත්නම් සිනාව ඒ අතරින් මුල්තැන ගන්නවා සැක නැහැ. පමණක් විටෙක ඒ මද සිනාව ලබන්නා ඒ මොහොතේ ලබන සුන්දරම, මිලකළ නොහැකි දායාදය ඒ සොඳුරු සිනහව වෙන්න පුළුවනි. එහෙත්, වියරු සිනහව අනපේක්ෂිත අප්‍රසන්න අවස්ථාවන් ඇති කරතෑකි.
ක්ලැරන්ස් විජේවර්‍ධන ගයන ගීතයේ මෙහෙම කියනවා:
ඉඳහිට හමුවන මේ පුංචි වෙලාවේ
ඇයි මේ ඔය තරමට අගය හිනාවේ
යහළු මිතුරු අය මග දී මුණගැසුනාම
සඟවන්නට එපා පිපෙන සුවඳ හිනාව
ඇත්තටම යහළු සිනහවක් මොනතරම් නම් අගේ ද?

ජිප්සීස් ගායක කණ්ඩායම ගයන ගීතයක, කියනවා:
හිනා හිනා හිනා හිනා වෙන්න හිනා
ඔහ් හිනා වෙන්න හිනා තරැණ වෙන්න හිනා
හිනා හිනා හිනා හිනා වෙන්න හිනා
කරදර ඉවත දමා පොඩ්ඩක් වෙන්න හිනා...
සිනහව කියන්නේ ඔසුවක්, අමිල ඔසුවක්. උදෙන්ම ඔබ මුණගැහෙන පුද්ගලයාට පුංචි, ලස්සන සිනාවක් පිරිනමන්න. එය එම පුද්ගලයාගේ දවසම වෙනස් කරන තිළිණයක්, driving force එකක් වෙන්න පුළුවන්.
ඔබේ චූටි පුතා මිඳුලේ වැහිවතුර වළක බැහැලා මඩ නාගෙන ගෙට එද්දි ඔබට කොහොමද දැනෙන්නේ? චූටි මුව රවුම් කරලා, curve කරලා පුංචි සිනාවක් දාද්දි එයාගේ නෝටි වැඩේ අමතක වෙනවා නේද?
රෙස්ටුරන්ට්, පාරිභෝගික සේවා, පිළිගැනීමේ නිලධාරි, ගුවන් සේවා සේවක මඩුල්ල ආදී පමණක් front-end රැකියා තියෙනවා රස්සාවටම සිනාසිය යුතුවෙන. බොහෝවිට ඔවුන් පුදන්නේ මවාගත් සිනාවක් වෙන්න පුළුවන්, එය මැනිය හැකි ක්‍රමයක් ඔබ වෙත නොවෙන්න පුළුවන්. සමාජයේ අපිට මුණගැහෙන අනික් අය ගැන ද ඒ කතාව පොදුයි. කෙසේ නමුත් පෙරළා ඔබ ඔවුන්ට නිර්‍ව්‍යාජ සිනාවකින් පිළිතුරු දෙන්න.
අද අපි ගෙවමින් ඉන්නේ මෑත ඉතිහාසයේ කවදාවත් මුහුණපා නැති තරම් දුෂ්කර කාලයක්. කෙනෙකුගේ ජීවිතය මොනතරම් බැරෑරුම් ද, දුෂ්කර ද හිතලා බලන්නවත් බැරි අවධියකය. හැකි සෑම විටම ඔබට මුණගැහෙන හැම කෙනෙකුටම සොඳුරු සිනාවක් පිරිනමන්න, ඔහු/ඇය පෙරලා පිළිතුරු සිනාවක් පාවි. අනිවාර්‍යයෙන් එයින් ඉහත කී ශාරීරික සුවයට මෙන්ම මානසික සුවය ඔවුනට ලැබේවි. ඒ ප්‍රතිලාභ ඔවුන්ට ලැබුණත් නැතත් ඔබේ නිර්‍ව්‍යාජ සිනාවකින් ලැබෙන යහපල ඔබේ සිරුරට, සිත් සුවයට ලැබේවි. තවත් සිතක සුවය සදන සතුට ඔබ වටා සතුට වඩාවි.

සිනා බෝ වේවා!

2022 ලෝක සිනහව දිනය නිමීත්තෙන් ලියූවකි

ස්මයිලි | Smiley (ශනිදා දහයට!)

 

පසුගිය දවස් හත ඇතුළත ඔබ කීවරක් Smiley Face පාවිච්චි කරා ද?

අද ලෝකයේ සමාජ මාධ්‍ය භාවිතා කරන්නන් අතර නැතුවම බැරි විවිධ රූප සංකේත, ඉමෝජි, රිඇක්ට්ස් අතර Smiley ප්‍රමුඛස්ථානයක් ගනී. මුල් ස්මයිලි ෆේස් සංකේතය ලොව එළිය දුටුවේ කවදාද කියා ඔබ දන්නවාද?
ඇමෙරිකානු වෙළඳ ප්‍රචාරක ක්ෂේත්‍රයේ නිර්‍මාණකරුවෙකු වූ හාවි රෝස් බෝල් (Harvey Ross Ball) ස්මයිලි ෆේස් නිර්‍මාණකරුවා ලෙස සැලකේ. 1963 වසරේ දී රක්ෂණ සමාගමක් විසින් හාවිගේ සේවාව ෆ්‍රීලාන්ස් ඩිසයිනර් කෙනෙකු ලෙස ලබාගෙන ඇත. සමාගම් දෙකක් ඒකබද්ධකර පිහිටවූ එම නව රක්ෂණ සමාගම කෙරෙහි එහි සේවකයින් එතරම් සතුටක් දක්වා නැත, හාවිට පැවරුණේ සේවකයින්ගේ චිත්ත ධෛර්‍යය (morale) නංවාලිය හැකි ඩිසයින් එකක් නිර්‍මාණය කිරීමය. ඔහු විනාඩි දහයක තරම් කෙටි කාලයක දී, එය මනාව ඉටු කළේය. එම ඩිසයින් එකෙහි එක් ඇසක් අනෙකට වඩා ලොකු වූ අතර, කන් දෙක දක්වා විහිදුන පුළුල් මුව සිනාවෙන් යුතු සතුටින් පිරි දීප්තිමත් කහ පැහැ මුහුණකි. එම නිර්‍මාණය පළමුව සමාගමේ විධායක නිලධාරීන්ගේ මුවට සිනහව ගෙන ආවේය. ඔවුන් ඒ සරල අරුත්බර නිර්‍මාණය ඉතා සතුටින් බාරගෙන ඇති අතර ඒ සඳහා ඩොලර් 45ක ගෙවීමක් කර ඇත.
එම ස්මයිලි නිර්‍මාණය යොදා ගෙන සමාගම ස්මයිලි පින් (Smiley pin) සියයක් නිපදවා සේවකයින් අතර බෙදා දී අත්තේ රාජකාරී කාලය තුළදී පැළදිම සඳහාය. එය කොතෙක් ජනප්‍රිය වූයේ ද කියනවා නම් කෙටි කාලයක දී ස්මයිලි පින් 10,000ක් අලෙවි වූ බව කියවේ. 1971 වෙද්දි ස්මයිලි පින් අලෙවිය මිලියන 50ක් ඉක්ම වූ බව සඳහන් වේ.
හාවිගේ ස්මයිලි ෆේස් ලොව පුරා iconයක් වෙන්නට විය.
1921 උපන් හාවි, 1998 දී තම නිර්‍මාණයේ 35 වන වසර සමරා ඇත. 1999 දී World Smile Foundation නමින් ස්වේච්ඡා සංවිධානයක් ආරම්භ කර ඇත්තේ ළමා අභිවෘද්ධිය ප්‍රධාන අරමුණ කරගෙනය. 1999 දී පළමු ලෝක සිනහව දිනය සමරා ඇත්තේ හාවිගේ සංවිධානයේ අනුග්‍රහයෙනි. ලොවට සිනාවේ සංකේතය උරුමකර දුන් හාවිගේ මුව සිනාහව 2001 අප්‍රේල් 12දා වියැකී ගියේය. ඉන් පසුව හාවි අනුස්මරණ “Harvey Ball World Smile Foundation” පිහිටුවා ඇත, එහි ආදර්‍ශ පාඨය වෙන්නේ “ලෝකයේ යහපතට, එක සිනාවක්” “enhancing this world, one smile”. අදටත් හාවි සංවිධානය ලෝක සිනහව දිනය සැමරිමේ ප්‍රධාන අනුග්‍රාහකයා වේ.
ලොවට සිනහව සංකේතය පිදූ නිර්‍මාණකරුවා කිසිදා තම මෝස්තරයේ අයිතිය බදාගන්නට තරම් කෑදරයෙකු නොවිය, එය තම වෙළඳනාමයක් යටතේ ලියාපදිංචි කරන්නට කැමැත්තක් දැක්වා නැත. ඔහු ඉතා සරල මනුස්සයෙක් විය, එය සනාථ කරන ඔහුගේ පුතාගේ වචන වලින් he was not a money-driven guy, he used to say, "Hey, I can only eat one steak at a time, drive one car at a time". හාවි ඉන්න තැනක සිනහ බෝ වේවා!
එනමුත් සෑම ලෝක සිනහව දින සැමරුමකදිම හාවිගේ නිර්‍මාණය යොදාගෙන නිපදවන සිහිවටන භාණ්ඩ වලින් සෑහෙන මුදලක් උපයනවා ඇත. මෙම ලිපියේ අරමුණ වාණිජ අරමුණු සහිතව පවත්වන ලෝක/ජාත්‍යන්තර දින කැලන්ඩරයේ තවත් දවසක් මතුකර දැක්වීම නොව, ඉන්ටනෙට් භාවිතය ප්‍රචලිත වූ දවස පටන් කැරැක්ටර් බේස් සිස්ටම්ස් වලින් පටන් ගෙන අද දක්වා විකාශය වී ඇති හුරුබුහුටි Smiley Face නොදත් කතාව ගෙන ඒමය. සුන්දර නිර්‍මාණකරුවෙකු වූ හාවි විසින් ලොවට ඉතිරි කරගිය ලෝකයේ යහපතට, එක සිනාවක් “enhancing this world, one smile” සංකල්පයේ මානුෂික හා මානසික සුවය පැත්තෙන් බැලීමය.

2022 ලෝක සිනහව දිනය නිමිත්තෙන් ලියූවකි

*සෑම වසරකම ඔක්තෝබර් මස පලමු සිකුරාදා දිනය ලෝක සිනහව දිනය - World Smile Day හැටියට නම් කර ඇත

Friday, October 27, 2023

ඇය | She

 




ඇය
ශක්තිමත්ය ඔබ සිතනවාට වඩා
බලවත්ය  ඔබ දන්නවාට වඩා
නැණවත් ඇය පෙන්වනවාට වඩා
අව්‍යාජ ඔබ දකිනවාට වඩා
ඇයට හැකිය දකින්නට
සුන්දරත්වයක් හැම දෙයකම
පෙරළිකාර,
ත්‍රාසය මුසු,
නමුත් අචල
විශ්වාසවන්ත.
ඒ ඇය,
වෙන කවුරුද...


උපුටා ගැනීම: අන්තර්ජාලයෙන් (කතෘ: P.T. Berkey)
පරිවර්තනය: එම්. ඩීන්, ගල්මල්-Coral

Saturday, October 21, 2023

ඇතමෙකුට ඇය අමුතුය | Some Found Her Odd (ශනිදා දහයට!)

 


ඇතමෙකුට ඇය අමුතුය
දියමන්තියට වඩා 
කවියට මන බැන්ද ඇය,
කරවට මුතුමාලය ඇයගේ
අලංකාර වදන් පෙලකි,
ලස්සනට අමුණන.
ඇයගේ විපුල හදින්,
අලංකාර මොහොතක් සිතුවම් කරන
අමිල සිනහවෙන් පුරවන,
ඇතමෙකුට ඇය අමුතුය.
එනමුදු මට, ඇය ශ්‍රේෂ්ඨය
මැණික විරල.


* නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: John Mark Green)
පරිවර්තනය: එම්. ඩීන්, ගල්මල්-Coral

මැජික් (ශනිදා දහයට!)

එකොමත් එක රටක ජනාධිපතිතුමා හා අගමැතිතුමා විදේශයක ලෝක සමුළුවකට සහබාගී වෙන අතරතුර ඔවුන්ට වෙනත් රාජ්‍ය නායකයෙකු විසින් රාත්‍රී භෝජනය සංග්‍රහයක් පවත්වනවා, ප්‍රධාන පෙලේ හෝටලයක...


ජනාධිපතිවරයා ඔහුගේ පිරිවර සමඟත් අගමැතිවරයා ඔහුගේ පිරිවර සමඟත් ශාලාවේ දිග මේසයක මුහුණට මුහුණලා අසුන්ගෙන සිටිනවා.


රාජ්‍යනායකවරුන්ට සැකසූ කෑම මේසය බොහෝම වටිනා පිඟන් කෝප්ප ආයිත්තම් වලින් පිරිලා, හැඳි ගෑරුප්පු එහෙම රන් ආලේපිත ඒවා විය. ජනාධිපතිතුමා මෙවන් තැනකින් සිහිවටනයක් හැටියට වටිනා පුංචි දෙයක් අරන් යන්න පසුබට වෙන්නේ නැහැ. සාමාන්‍යයෙන් මෙවැනි තැනක එහා මෙහා වෙන දේවල් ගැන කවුරුවත් තකන්නේ නැහැ, නොදැක්කා වගේ ඉන්න එක සිරිත නෙවැ. ඒත් පොඩි ප්‍රශ්ණයක්, මෙදා ඔහුට කලින් අගමැතිවරයා ඉස්සර වුන හැටි දැකලා පොඩ්ඩක් අප්සෙට් වුනා.


සතුටු සාමිචියෙන්, සැහැල්ලුවෙන් පිරුණ කතා අතර ජනාධිපතිවරයාට පොඩි කට්ට අදහසක් පහළ වුනා.


ජනාධිපතිවරයා මැජික් එකක් පෙන්නන්න ඉදිරිපත් වෙනවා.


"මිත්‍රවරුණී, මම මේ හැන්දයි ගෑරුප්පුවයි මගේ සාක්කුවට දානවා. ඒවා අපේ අගමැතිතුමාගේ සාක්කුවෙන් අරන් පෙන්නනම්" කිව්වේ සභාව මවිතයට පත් කරමින්.


අගමැතිවරයාට හීන් දාඩිය දානන්නට විය. වෙනෙකෙකු තම සාක්කුවට අත දාන්න කලින් හිනාවක් දාගෙනම තමා කලින්ම සාක්කුවට දාගත් රන් අලේපිත හැන්ද හා ගෑරුප්පුව අරන් පෙන්නන්නට විය.


* 80 දශකයේ අග ප්‍රසිද්ධ කතාවකි

Thursday, October 19, 2023

ලේන්සුව | Handkerchief

 


හැඩ වැඩ
ලියවැල් මල්දම්
පාට පාට නූලෙන්
ඇන ඇන ඉඳිකටුවෙන්
මසා
හැඩ කර ලේන්සුව
අත්පිසනයක්
වුනේ කෝමෙයි
නුඹට...

Wednesday, October 18, 2023

ලයිට් හවුස් | Light House

 



කාරි නැත කුණාටුව,
නුඹය ආලෝකය නිතොර
මග කියන
මයේ නිවහනට...

නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Brandi Fitzgerald)
පරිවර්තනය: එම්. ඩීන්, ගල්මල්-Coral

Sunday, October 15, 2023

ඔබය මාහැඟි | The Finest

 


ඔබය මාහැඟි,
ආදරණීය,
මුදු,
වඩාත් සෝබමාන
පුද්ගලයා මා සොඳින් දන්න
-- එනමුදු එයද අවතක්සේරුවකි
(නොදනිමි කෙසේ පවසන්න ද?)

නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: F. Scott Fitzgerald)
පරිවර්තනය: එම්. ඩීන්, ගල්මල්-Coral

Saturday, October 14, 2023

මුහුදු රළ | A Wave (ශනිදා දහයට!)

 



ඔබේ උදව්වක් ඕනෑකරන මිනිසුන්
බොහෝවිට
ඔබෙන් ඉල්ලීමක් කරන්න බැරි තරමට හෙම්බත්ය.
ඔවුනට අතදෙන්න.
දියේ ගිලීම
හැමවිටම
ගිලීමක් හැටියට
නොපෙනෙන්න පුලුවනි.


Iain S. Thomas කවියාගේ A Wave කවියේ පරිවර්තනයකි.
පරිවර්තනය: එම්. ඩීන්, ගල්මල්-Coral

Friday, October 13, 2023

තනි වාක්‍යයක් වූ මා | Merely a Sentence

 


මා හුදෙක් තනි වාක්‍යයකි
ඔබේ ජීවිතයේ.

එනමුත් මා පිරවූයේ
පොත්ගුල
ඔබ ගැන සිතමින.


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: o.l)
පරිවර්තනය: එම්. ඩීන්, ගල්මල්-Coral

Thursday, October 12, 2023

ප්‍රේමය | Love, Story or Poetry

 


එය
පවතින්නේ නම්,
ප්‍රේමයකි.
ඉවර වූයේ නම්,
පෙම් කතාවකි.
පටන්ගෙන නැති නම්,
කවීකමකි.


උපුටා ගැනීම: අන්තර්ජාලයෙන් (කතෘ: නොදනී)
පරිවර්තනය: එම්. ඩීන්, ගල්මල්-Coral

Wednesday, October 11, 2023

සිහින දකින්නන් | Dreamers

 


ඔවුනට පුලුවන
බලන්න
ඇස් ඉමෙන් එපිට
දකින්න
හැම දෙය පුලුවන් වෙතැයි.
ඔවුන්
මාගේ ප්‍රියයන්ය --
සිහින දකින්නන්.

නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Topher Kearby)
පරිවර්තනය: එම්. ඩීන්, ගල්මල්-Coral

Tuesday, October 10, 2023

මට අවැසි | I Want You

 


මට අවැසි නුඹ
පොඩි ළමයෙකු වගේ
කඩසාප්පුවල ඇති
කැඩෙන බිඳෙන හැම දෙයම
අතපත ගාන,
මට උවමනා නුඹ
කැලෑ මලක් වගේ
ඉඩෝරයේ වරුසාව පතන,
මට ඕනේ ඒත්තු ගන්වන්න
මම ආදරෙයි නුඹට
මින් පෙර කවදාවත්
කවුරුවත් නුඹට ආදරේ
නොකළ තරමට.


උපුටා ගැනීම: අන්තර්ජාලයෙන් (කතෘ: Kristina Mahr)
පරිවර්තනය: එම්. ඩීන්, ගල්මල්-Coral

Monday, October 9, 2023

ඉඳහිට | Blue Moon

 


ඉඳහිට අමුතුම දෙයක් සිදුවෙන,
එහෙමත් වෙලාවක සිහින සැබෑවෙන,
මුළු ජීවන රිද්මයම වෙනස්වෙන,
එහෙමත් දවසක නිල් සඳ මෝදුවෙන.

සටහන:
Once in a blue moon ඉංග්‍රීසියේ ලස්සන යෙදුමක්, බොහෝම විරලව, ඉඳහිට කියන අදහසින්. 2023 අගෝස්තුවේ පුරපෝය දින දෙකක් වැටුනා, ඉඳහිට එක ග්‍රෙගෝරියානු හෙවත් ඉංග්‍රීසි කැලන්ඩර මාසයක පුරපෝය දෙකක් යෙදීම Blue Moon හැටියට ඉංග්‍රීසියේ බාවිතාවේ, ඇත්තටම එය නීල වර්ණ සඳක් නොව විරල සිදුවීමක් කියන අදහසය.

නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Julia Green)
පරිවර්තනය: එම්. ඩීන්, ගල්මල්-Coral

Sunday, October 8, 2023

විඩාබර මිහිකත | When Earth is Tired

 




විඩාබර මිහිකත
මිහිකත, විඩාබර වූ දා
ඇය ද නිසසල වෙනු ඇත.
ඇයගේ නිවැසියන් බෙරිහන් දෙනු ඇත,
නමුත් ඇය අවදිවේවි ද? නැත.


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Alarm, Say Wynter)
පරිවර්තනය: එම්. ඩීන්, ගල්මල්-Coral

Thursday, October 5, 2023

ඇදවැටෙන පිහාටුවක් | Falling Feather


 
හිස් අහසේ
උඩින්
ඈත සැරිසරන
කුරුල්ලෙක්,
උගේ තටුවකින් මිදී
නිදහසේ ඇදවැටෙන
පිහාටුවක්,
දැක
තුටින් ගයමින් නටන
පැණි කුරුල්ලෝ,
උන් දනී දෝ
ඒ වෙද්දි
ඌ බොහෝ ඈත
ගිහින් ඇති වග
නිදැල්ලේ...

* හැලී වැටෙන පිහාටුවක් දැක තුටු වෙන මල්ගොනු වටා ගී කියමින් නටන පැණි කුරුල්ලන්ට වගේ වගක් නැහැ මිදී පලාගිය උකුස්සන් ගැන

Wednesday, October 4, 2023

පියනඟමු පෙළින් පෙළට | Walk the Line

 



සෙනෙහෙබර ඔවුන්ය
තම කොටස මැනවින් ඉටුකරන
සිනාවකින් සරසාගෙන මුහුණ
යටකරගෙන හද වේදනා
 
රළු සැඩ රළ මත පදින
එනමුත් හැමවිට
සඟවාගෙන වේදනාව
මුවපිරි සිනාවකින්

මෙය ඔවුනටය
වැස්සෙන් පීඩා විඳින
මුරණ්ඩු වාරකන් කල
අඳුර වසා ගත්

කවුරු සීරුවෙන් පෙළගැසෙත් ද
මග තනන්න
වඩාත් හොඳ දිවියකට
යහපත් හෙට දවසකට


උපුටා ගැනීම: අන්තර්ජාලයෙන් (කතෘ: ජිමි ඔස්බෝන්)
පරිවර්තනය: එම්. ඩීන්, ගල්මල්-Coral

Tuesday, October 3, 2023

රාත්‍රියට ඇස් දහසකි | The Night Has a Thousand Eyes

 


රාත්‍රියට ඇස් දහසකි,
දිවා කල එකම එකකි;
එනමුත් ලොව ප්‍රභාවත් කරන ආලෝකය
මියැදෙයි හිරු බැස යත්ම.

සිතේ ඇස් දහසකි,
හදවතට එකම එකකි;
එනමුත් ජීවිතය එළිය කරන ආලෝකය
මියැදෙයි පෙමක කම්මුතු.


Francis William Bourdillon [1852-1921, British poet] කවියාගේ The Night Has a Thousand Eyes කවියේ පරිවර්තනයකි.
පරිවර්තනය: එම්. ඩීන්, ගල්මල්-Coral

Monday, October 2, 2023

අවබෝධය | Perception

 



ඔබ දකින කැලැල්
මා දකින කලාව
ඔබ දකින පලුදු
මා දකින විශ්මිත අලංකාරය
ඔබ දකින අසමත්කම්
මා දකින දැනුම හා වර්ධනය
සියල්ල අවබෝධය
ඔබ ඔබේ දෙනෙතින් දකින
මා මනසිනි දකින
අන්න එහෙමයි ඔබ පැද්දෙන්නේ
මා පෙරලෙන්නේ


උපුටා ගැනීම: අන්තර්ජාලයෙන් (කතෘ: නොදනී)
පරිවර්තනය: එම්. ඩීන්, ගල්මල්-Coral

Sunday, October 1, 2023

නිහඬ පෙම - I Choose to Love You in Silence

 


නුඹ හා පෙමින් වෙලෙන්නට නිහඬතාවය තෝරාගත්තෙමි,
මුනිවතට ප්‍රතික්ෂේපයක් නොමැත
නුඹ හා පෙමින් වෙලෙන්නට හුදෙකලාව තෝරාගත්තෙමි,
හුදෙකලාවේ කිසිවෙකුට නුඹ අයිති නැත මට මිස
නුඹ හා ආලයෙන් වෙලුනෙමි දුරින් සිට,
දුර වේදනාවෙන් මා ආරක්ෂා කරන නිවාරකය වෙනවා ඇත
නුඹ සිප ගත්තෙමි සුළඟේ දැවටී,
සුළඟ මදෙතොලට වඩා මුදු ඇති
නුඹ තුරුල් කරගත්තෙමි සිහිනෙන්,
සිහිනයේ මගේ නුඹ නිම් නැත.


මහාකවි රූමි කවියාගේ I Choose to Love You in Silence කවියේ පරිවර්තනයකි.
පරිවර්තනය: එම්. ඩීන්, ගල්මල්-Coral

Saturday, September 30, 2023

කවිය වෑහෙන්න | Unfurl Your Words

 



ඔබේ වදන් මුදාලන්න
අහස් කුස සිසාරන්න
ඔබේ කවිය වෑහෙන්න
අත්තටු දෙන්න සැරිසරන්න


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Darrielle Cresswell)
පරිවර්තනය: එම්. ඩීන්, ගල්මල්-Coral



Friday, September 29, 2023

හද සයුරකි | The Heart of Man

 


මිනිස් හදවත
බොහෝ විට
සාගරය බඳුය,

එහි
කුණාටු ඇතිවේ
රළ නැගේ,

එය
ගැඹුරුය
එපතුලේ
මුතු ද වෙති.


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Vincent Van Gogh)
පරිවර්තනය: එම්. ඩීන්, ගල්මල්-Coral




Thursday, September 28, 2023

වෙළෙන්නට ඔබ හා | Intertwine with You

 


මසිත කොඳුරයි
පතන්නේ
වෙළෙන්නට ඔබ හා
රළු රළ පෙරළමින් එනවිට
ජීවිතයේ
අපි එකෙකුම වෙනු ඇත
දුරස්කළ නොහැකි...

නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Mustafa Tattan)
පරිවර්තනය: එම්. ඩීන්, ගල්මල්-Coral

Wednesday, September 27, 2023

එකා මෙන් | As One



නුඹේ දෙඩවිල්ල,
මට ඇසෙන.
නුඹේ පහස,
මං විඳින.
නුඹේ සිතුවිල්ල,
මට හැඟෙන.
නුඹේ හැඟීම,
මට දැනෙන;
ආදරය,
ආත්මය හා බැඳුන,
ගැඹුරු,
සදාකල්...


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: නොදනී)
පරිවර්තනය: එම්. ඩීන්, ගල්මල්-Coral

Tuesday, September 26, 2023

මුනිවත | Scilence



නුඹේ වදනින් මට රිදෙතැයි
බියපත්ව
මුනිවතින් මා රිදවන්නේ
ඇයි නුඹ


නිර්මාණ ගෞරවය මුල් නිමාණකරුවන්ට හිමිවේ.
උපුටා ගැනීම: අන්තර්ජාලයෙන් (කතෘ: Pink Sky)
පරිවර්තනය: එම්. ඩීන්, ගල්මල්-Coral