මගේ බස

 

බහ තෝරන කාලයේ

සුළඟේ ඇදෙන්න ඇති

හිස් කන්පෙති මත දැවටෙන්න ඇති

වරින් වර හිතේ රැඳෙන්න ඇති

හුරුවෙන්න ඇති, බස

ගල්කූර ගල්ලෑල්ලේ හැඩ මවන

දයාබර, කරුණාබර වදන්

සාමලා අමරලා යාළුවෝ

හිතන්න, ලියන්න

සුබසක උරුමය ලැබුවා

කටු අකුලක පුංචි පැලය 

සිලි සිලි සුළඟ, මාරුත කුණාටු මැද

අතු ඉති විහිදා සින්දූරය වැඩුණා

මුල ගැඹුරට ඇදුණා, සවිය දුන් බස

මා වඩා පෝෂණය කර බස

හිතන පෙරනිමි බස

අකුරු කරන බස

ලොව සුන්දරම බස

මගේ බස

සිතුවිලි වලට පණ දෙන බස

මියුරු පද මුමුණන බස

ඉතින්, වියරු සුළඟේ විරාමයක් අරගෙන

සින්දූරය සෙවණේ විඳපන්නේ

මගේ බස

ලොව සුන්දරම බස

භාෂාව පුද්ගලයෙකුගේ ජීවිතයේ සුවිශේෂී උරුමයක්, බහ තෝරන කාලයේ දී පරිසරය කෙනෙකුගේ භාෂාවේ හුරුවට අනුබල දෙනවා ඇති. කෙනෙකු අකුරු ඉගැන්වීම සිට පාසැල් දිවිය පුරා භාෂාව ප්‍රගුණ කරනවා ඇති, එය පාළමු බස හැටියට අභිෂේක ලබනවා ඇති. ඒ පළමු බස කෙනෙකුට යමක් හිතන්න පිටුවහල් වෙන භාෂාව, එහෙමත් නැත්නම් ඔහුගේඇයගේ පෙරනිමි නැත්නම් ඩිෆෝල්ට් භාෂාව වෙන්න පුළුවන්. එනමුත් මුල් පළමු බස මව්බස නෙවෙන්න පුළුවන්, හේතුව මව්බස හා එහි අරුත දෙන mother tongue, first language, native language  කියන හැඳින්විම විවිධ අවස්ථා වලදී වෙනස් අර්ථ දැක්වීම් වලට බඳුන් වෙන නිසා. 

පුද්ගලිකව, මගේ පළමු බස සිංහල. එය මා ලියන, කියවන සුභාවිත භාෂාව, ඒ වගේම ඉංග්‍රීසි ඊට දෙවෙනි මගේ බස. එනමුත් ජන කොට්ඨාශයකට අයත් නිසා මා බහ තෝරද්දී තෙපලූ බස මගේ පළමු බසම විය යුතු නැත, එබස ලිවීම හෝ කියවීම හැකියාව මට නැත. සන්නිවේදනයේ දී සුභාවිත භාෂාවන් දෙකට අමතරව පරිගණකයක් හුරුකර, හැසිරවිය හැකි, වැඩගත හැකි භාෂාවා කිහිපයක මගේ බස ලේබලය යටතේ දැක්විය හැකිය.

83-84 කාලයේ පටන් ගත් පරිගණකය සිංහලට හුරු කිරීමේ මගේ වෑයම නූතන AI යුගය දක්වා විහිදෙන අතර, බාසාව වෙනුවෙන් ඊටත් වඩා යමකට මුලපුරා ඇත. සදාචාරාත්මක හේතු මත දැනට ඒ ගැන විස්තර සාකච්ඡා කළ නොහැකිය.

මා නැණ ලැබූ බස, මගේ බස ය. සින්දූරයක් (ඕක් ගහක්) වගේ ඕනෑම සුළඟක් දරන්න පුළුවන් සවිබල අත්තිවාරමක් මට ලබා දුන් මගේ බස සිංහල ය කියා ගෞරවයෙන්, භක්තියෙන් කියමි.

සින්දූරය = ඕක් (oak) ගහ

පෙරනිමි භාෂාව = ඩිෆෝල්ට් (default) හෙවත් සවයංක්‍රීයව භාවිතා වෙන භාෂාව  

සුනම්‍ය - Bow Down, Rise Up

 

සුනම්‍ය (උණ ගසේ ගීතය):

පවන් සලයි, මල් හිනැහෙයි,

ගුමු ගුමුවයි සමනල තටු රඟන්නේ...

රළ නඟයි, ගඟ පහළට ඇදෙන්නේ,

සිලි සිලියයි නුඹ පවනට පුදන්නේ...

සිහින් සුළන් රැල්ලේ වෙලි

අතු ඉති පත් තාලෙට රඟන්නේ...

සිහින් සුළන් අහුරනු ඇයි

සිලි සිලියයි පවනට පුදන්නේ...

සුළන් සැරයි, සියොත් හඬයි,

පත් සැලෙයි, ගස් අතු ඇඹරෙන්නේ...

ගඟ සැරයි, හෝ හෝ හඬ නඟන්නේ,

වියරු සුළඟේ නුඹ කොහොමද ඉඳින්නේ...

සිහින් සුළන් රැල්ලේ වෙලි

අතු ඉති පත් තාලෙට රඟන්නේ...

වියරු සුළන් අහුරනු බැහැ

නමා සිරස මාරුතයට ඉඩ හරින්නේ...

සුනැමි නුඹ හැම විඳගෙන

අතු විහිඳා අහස උසට නඟින්නේ...

පුරුකෙන් පුරුක සවිබලව වැඩෙන්නේ

පාමුලින් කපා කවුරුද නුඹ බිම හෙළන්නේ...

උසින් උසට පිය නඟින එවුනට

පුරුකක්වී යුතුකම පුදන්නේ...

උන් ඉහළින් ඉහළට නඟින්නේ,

අපි සතුටින් පහළට බහින්නේ...

සිලි සිලියයි පවනට පුදන්නේ,

නමා සිරස මාරුතයට ඉඩ හරින්නේ,

උසින් උසට පිය නඟින එවුනට

පුරුකක්වී පිදෙන්නේ...

ශක්තිය යනු දෘඩ හෝ තද බව නොවන බව උණ ගස උගන්වයි. මෘදු සුළඟක දී, එය පැද්දෙමින්, මෘදු සුළඟ සිලි සිලියක සංගීතය බවට පත් කරයි. ප්‍රචණ්ඩ කුණාටුවකදී, එය පහළට නැමී, නොබිඳී යටත් වන අතර, සුළඟ බාලවූ පසු නැවත නැඟී සිටියි. කපා දැමූ විට පවා, එය කැමැත්තෙන් ඉදිරිපත් වන අතර, අන් අයට තනිවම ළඟා විය නොහැකි උසකට ඔසවන පලංචියක් බවට පත්වේ.

ජීවිතයත් එසේමය. කරුණාව කරුණාවෙන් හමුවන්න, ප්‍රීතියට එහි හඬ, රිද්මය සොයා ගැනීමට ඉඩ දෙන්න. අභියෝග හමුවේ නම්‍යශීලීව දුෂ්කරතාවන්ට මුහුණ දෙන්න. නැමෙන්න, නමුත් බිඳී නොයන්න. ඔබට හැකි විට, පරාර්ථකාමීව යුතුකම ඉටු කරන්න, එවිට අන් අයට නැඟී සිටිය හැකියාව ලැබෙනවා ඇත. සෑම කුණාටුවක්ම පහව යන අතර, ගැඹුරින් මුල් බැසගත් සහ ත්‍යාගශීලී ආත්මයන් උසින්, ශක්තිමත් සහ ප්‍රඥාවන්තව නැඟී සිටිනවා ඇත.

මෙම නිර්මාණය උණ ගස විසින් කියා දෙනු ලබන සුවිශේෂ ජීවිත පාඩම වටා ගොඩ නැඟුවෙමි. උණ ගස නිමිත්ත කරගත් නිර්මාණයක් මා පළමුව කළේ 2011 දී, එම නිර්මාණයේ පිදුම සටහන මෙසේ විය: ඉහළට නඟින්න තැනෙන අට්ටාලයක උස සකසන්න නැතිනම් කොටසක් දරන්න ජීවිතය කැපකර උණ ගස් වලට වඩා උස, මිටි වූ මිනිසුනට. ජීවන චාරිකාවේ බොහෝ නිහඬ කැපවීම් කර දිරායන පුද්ගලයින් බොහෝ හමුවී ඇත, විශේෂයෙන්ම කට්ට කාෂ්ටක පරිසරයක් ගැහැට විඳගෙන මැදපෙරදිග රැකියාව කරන කාලෙයේ හමුවූ ඔවුන් විශේෂයි. ඔවුන් පියවරු විතරක් නෙවෙයි ජීවිතයේ යව්වනය අනුන් වෙනුවෙන් දියකර වැඩිමහල් සොයුරන්, බාල සොහොයුරන් වගේම ඥාතීන් ගේ චරිත පණ පෙවූ අය විය. ඒවගේම ඊට නොදෙවෙනි භූමිකාවක නිරත කාන්තා පාර්ශවය ද බොහෝ වෙති.

සුනම්‍ය නිර්මාණය රසබර ගීතයක් කරා, සුනම්‍ය - උණ ගසේ ගීතය සවන් දෙන්න, රසවිඳින්න, ගීතය ගැන ඔබේ අදහස් අගේ කරමි.

තවද සුනම්‍ය නිර්මාණය Bow Down, Rise Up හැටියට ඉංග්‍රීසියෙන් ද නිර්මාණයක් හා ගීතයක් වුණා. එම පෝස්ටුව මගේ Amazing Spring බ්ලොග් අඩවියේ මීට සමගාමීව පළකර ඇත.

නුඹට පුළුවන් - You Can

 

හැඩතල නවා, මෝස්තර දමා

යකඩවලට හුස්ම දුන්නා,

පියාපත් දුන්නා විද්වතුන්...

ගුවන සිසාරා පියාසර කරනවා,

යකඩ කුරුල්ලෝ...

බඹරුනේ උඹට බැහැ පියාඹන්න

ඒ විද්වතුන් කිව්වා…

සුවඳ සොයා, ඈත දුර ගෙවා

හිමිදිරි උදයේ පියාපත් සැලුවා බඹරුන්

මල් පෙති නොතලා,

මල් පැණි රස වින්දා...

බඹරුනේ උඹට බැහැ පියාඹන්න

ඒ විද්වතුන් කිව්වා…

ඒත් උන් පියාපත් සැලුවා,

අහස දිහා බැලුවා, ඉගිල ගියා…

බින්දු, බින්දු, පැණි පුරවා,

රස මී බෙදුවා...

පරවෙන මලට හරයක් දුන්නා,

ගස් වැල් පළින් බර වුණා...

බඹරුනේ උඹට බැහැ පියාඹන්න

ඒ විද්වතුන් කිව්වා…

ඒක නොදත් වන බඹරා

තත්පරයකදී සිය, දෙසිය වතාවක් තටු ගැසුවා…

දවස ගානේ ඈත දුර ගෙවා ඉගිල ගියා

ගුමු, ගුමු, ගී මුමුණා මල් පැණි රස බැලුවා…

පසු බැස්සේ නැහැ, නැහැ පුංචි යාළුවා…

කවුද කිව්වේ පුතේ නුඹට බැහැ කියලා?

ඇයි හැංගෙන්නේ මුළු ගැන්විලා?

හිතන්න, පුංචි වන බඹරා

කවුරුවත් කියූ හන්දා 

ඌ ඉන්නවාද පියාපත් හකුළා?

නෑ, නෑ

බඹරුන් පියාපත් හකුළාගෙන හිටියේ නෑ

සට, සට, ගා අත්-තටු සැලුවා

ගුමු, ගුමු, ගී මුමුණා ජීවිතය වින්දා

යුතුකම් ඉටු කළා...

උඹට බැරි නැහැ පුතේ

එපා, එපා, හැංගෙන්න

උසට උසේ නිල් අහසයි,

ඈත පේන සිතිජයයි

උඹට පුළුවන් ජය ගන්න!

කවුද කිව්වේ බැහැ කියලා?

උඹට පුළුවන් ජය ගන්න!

පියාඹන්න බැහැ කියූ බඹරුන්

ඈත දුර ගෙවා අත්තටු සැලුවා

ඉගිල ගියා, ඉගිල ගියා...

විද්වතුන් ලිව්වා කතාව අලුත් කරලා

“බඹරුන්ට පුළුවන්ලු පියාඹන්න...”

උන් පියෑඹුවා,

උන් හැමදාම පියෑඹුවා…

කවුද කිව්වේ බැහැ කියලා?

බඹරුන්ට පුළුවන් පියාඹන්න!

එපා, එපා, හැංගෙන්න

එපා, එපා, පසුබසින්න

බඹරුන්ට පුළුවන් පියාඹන්න

බඹරුන්ට පුළුවන් පියාඹන්න!

කවුද කිව්වේ බැහැ කියලා?

නුඹට පුළුවන්... ජය ගන්න...

මා මීට කලින් වතාවන් කිහිපයක දී ලියා ඇති මගේ වෘත්තීය ජීවිතයේ විවිධාකාර පුහුණුකිරීම්, කණ්ඩායම් ගොඩනැඟීම් ආදී නොයෙකුත් වැඩමුළු, වැඩසටහන් ආදිය කරා කියන එක. ඒ ලබාපු අමිල අත්දැකීම, පළපුරුද්ද උපකාරී කරගෙන විභාග වලට සූදානම් කිරීම, ඉහළ අධ්‍යාපන මට්ටමේදි අභියෝග වලට මුහුණදීමට සූදානම් කිරීම ආදීය මුල්කරගෙන වැඩසටහන් කරගෙන යනවා. එවන් අවස්ථාවලදී උපයෝගී මාතෘකාවක් වටා ගෙතුන මගේ කියමනක් Believe Beyond the Blueprint කියන එක, එය මුල්කරගෙන පදපෙළක් කිරීමේ අවශ්‍යතාවය කලයක පටන් හිතේ තිබුණත් එම අදහස නිර්මාණයකට කැටිකිරීමේ අභියෝගය නිර්මාණය කිරීම පමා කරා කියන එකයි නිවැරදිම කියවීම. කිසියම් අවශ්‍යතාවයකට මෙම කරුණ මුල්කරගෙන, Lighthouse බ්ලොග් සඳහා ලිපියක් ලියන්න වුනා. එම ලිපිය ලිවීම, මෙම අදහස බ්ලොග් වලින් ඔබ්බට ගෙනයෑමට නවීන AI තාක්ෂණය සලසන ඉඩප්‍රස්ථාව හා AI සිංදු නිර්මාණයට ඇති මගේ රුචිය "නුඹට පුළුවන්" නිර්මාණයට රුකුල් දුන්නා කියන්න පුළුවන්. හැබැයි, නිර්මාණය සිංදුවක් කිරීමේ වෑයමේ දී කෙළවරක් නැති අභියෝග මතු වෙන්නට විය, ඒකත් තේමාවට හරියන්නම "... පුළුවන්, ජයගන්න..." කියමින් සාර්ථකව නිමාකරගත්තා කියන එකයි මගේ විශ්වාසය, එනමුත් ඒ ගැන කියන්න පුළුවන් වෙන්නේ පාඨක ඔබටය...

නිර්මාණයේ නිමිත්ත හැටියට: aerodynamics නොහොත් ගුවන් යානයක් පියාසර කිරීමේ මූලදර්ම ගැන විග්‍රහ කරන විද්‍යාවේ (වායුගතික විද්‍යාව) න්‍යායන් වලට අනුව වන බඹරෙකුට පියාසර කිරීමට නොහැකි විය යුතුය (aerodynamically a bumblebee cannot fly). වන බඹරාගේ සිරුරේ හැඩය, පියාපත් වල පරාසය/ප්‍රමාණය මුල්කර ගෙන හැදෙන න්‍යාය 1930 ගනන් වල ඉඳන් පවතින එකක්. එනමුත් වන බඹරුන් කවදත් හිමිදිරියේම බොහෝ ඈතට පියාඹා, මලින් මලට යමින්, මල් පැණි උරමින්, රස ගුණ මීපැණි නිපදවා ලෝකයාට තෑගි කරමින් ඉන්නේ මෙලොව පටන් ගත් දා ඉඳන් වෙන්න ඕනේ. උදේ පිපෙන සුමුදු, මෙලෙක්, මලක් පරවෙන්න කලින් පරාගනය කරලා මෙ පෘථිවි තලයේ ජීවීන්ට ගෙඩි පළ ලබා දෙන්න පුංචි වන බඹරුන් ලොකු යුතුකමක් ඉටුකරන්නේ. පසුකාලීනව එකී විද්‍යාවම හඳුනාගන්නවා තත්පරයකට දෙසිය-තිස් වතාවක් පමණ තටුගසන වන බඹරුන්ට පියාඹන්න පුළුවන් වෙනවා කියන එක.

එම කතාව දිරිගැන්වීමේ (motivational) ක්‍රියාවලියේ දී අරුත්බර රිදී රේඛාවක් අඳිනවා. බොහෝ අවස්ථාවල දී කෙනෙකු උත්සාහය අතහැර දාන්නේ, අධෛර්යමත් වෙන්නේ, මුළු ගැන්වෙන්නේ ඔහුට/ඇයට බැරි නිසාම නොව ආපස්සට අදින බාහිර කාරනා ගොන්නක් නිසා. කවුරුන්හරි පුන පුනා කිව්වොත් "උඹට බැහැ" කියන එක, ඊට හිත වහල්වීමට ඇති ඉඩකඩ අපමණයි, හරියට හැම සැහැල්ලු යකඩ රොඩ්ඩක්ම කාන්දමක් විසින් ඇදගන්න සමත් වෙනවා වගේ. බොහෝ විට කෙනෙකු කරන්න මැලිවෙන, ඔහුට කරන්නට බැරිවූ දෙයක් තවෙකෙකු කරන්න උත්සාහ කරද්දී නැහැ, බැහැ කියන බැරිදාසලා හෙවත් Naysayersලා ගෙන් දුරස් වෙන තරමට ඉලක්කය කරා යන්න පුළුවන් වෙනවා. ඔවුන් කියන්නේ ඔවුන්ගේ සීමාව, බැරිකම මිස ඔබේ ශක්තිය ගැන නෙවෙන්න පුළුවන්. ජීවිතයේ අභියෝගයන් ජයගන්න නම් තවත් කවුරුන් හෝ කපලා දෙන ස්ටෙන්සිලයක හිරව පින්තාරු කිරීම හෝ කවුරුන් හෝ ඇඳලා දෙන සැලස්මක් හෙවත් ප්ලෑනකට කොටුවීම නොව, ඉන් ඔබ්බට පියවර යත හැකිය යන විශ්වාසයයි වැදගත් - Believe Beyond the Blueprint.

අනෙක, මෙම නිර්මාණය හා ඉන් බිහිවෙන සිංදුව අද විශේෂයෙන් පිදෙන්නේ එදා සිට අද දක්වා ගල්මල්-Coral අඩවිය වටා සිටිය හා සිටින්නා වූ රසවතුන් වෙනුවෙන්. නිර්මාණ ද්විත්වය ගෙනෙන මෙම පෝස්ටුව ගල්මල් අඩවියේ හාරසිය වැන්න සනිටුහන් කරයි. මෙ ගමනේ දිරිය, ශක්තිය, ජවය ඔබ මිස වෙන කවුරුන් ද?

තවද, ඔබට අරගෙන යන්න පුංචි තිළිණයක්: වෙනත් අයෙකුගේ හෝ බාහිර විශ්ලේෂණයක් නිසා ඔබේ අදහස, ඉලක්කය, අභිප්‍රාය දියවෙන්න යන අවස්ථාවක දී මතක් කරන්න කඩිසර පුංචි වන බඹරා ගැන. "විශ්ලේෂණය නිසා ඇතිවන අකර්මන්‍යතාව" (paralysis by analysis) තුළ සිරවී සිටින විට, වන බඹරුන් (bumblebee) කිසිදු පැකිලීමකින් තොරව ක්‍රියාත්මක වෙමින් තම පියාපත් ගසන බව හිතට ගන්න. ඔබ ජයගත් දා ඔබ වෙනුවෙන් අනුන් එල්බ සිටි නිගමන වෙනස් කර ලියන්න ඔවුන්ට සිදුවේවි.

නිර්මාණය හා සිංදුව ගැන ඔබේ අදහස් කියන්න, එය මට බොහෝ වටී.

සවන් දෙන්න නුඹට පුළුවන් (You Can) ගීතය 

The Breeze මගේ AI ගීත එකතුව රස විඳින්න:

The Breeze a pleasant wave of music | නැවුම් සුවඳ මුසු, ප්‍රසන්න මදනල නගන මියුරු ගී රාවය from ගල්මල්-Coral අඩවියෙන්

ග්‍රැෆික් ඉමේජය නිර්මාණයේ තේමාවට අදාලව හැදුවේ ChatGPT මගිනි.

තුතිමල් මිටක්: ලස්සන තනුව හා සිංදුව | Beautiful song done by Suno AI

උන්මාදය - Craze

 

තනමින් රැල්ල පැතිරි යන

රැඟුමක්, පෙරැත්තයක්, ආශාවක්…

කෙටි කලක් වැජඹෙන විලාසිතාවක්…

සිහිවටනයක, පෙමාදර තිළිණයක

දිළිසෙන මතුපිට ඔපය පුරා දිවෙන

සිහින් ඉරි තැලීමක්…

පෙම්බර හදක නැඟෙන, කිතිකවන 

සිහින්, උමතු විදුලිය රේඛාවක්…

ඈත තරු චමත්කාරය දෙන

ඝනාදුරු රෑ අහසේ

නැඟෙන විදුලිය කෙටීමක්…

කවුරු කෙසේ කිව්ව ද

උන්මාදය තීව්‍ර ශක්තියක්, 

සිහින සිතිජයෙන් නැඟ එන

ගල්පර වෙරළක බිඳී පෙඩිවෙන

මුදු පෙණ විසිරෙන

යළි මතුව එන

රළ පෙළක්…

නොවුනොතින් “උන්මාදයක්”

බිහිවේද නව නිපැයුමක්.

සෑම නව නිපැයුමක් බිහිවන්නේ මනසේ හටගන්නා "උමතු උනන්දුවක්" (Craze) තුළිනි.

විවිධ ආර ස්පර්ශ කරන්න ඇති කැමැත්ත නිසා රාමුවක කොටු නොවී ස්ටෙන්සිලයක පින්තාරුවෙන් බැහැරව උන්මාදය කියන විසල් සයුරින්; සංස්කෘතික/ප්‍රවණතා/රැල්ල (Cultural Fads), භෞතික අවිනිශ්චිතතා/අසම්පූර්ණතා (Physical Imperfections), මානසික තත්ත්වය සහ මනෝරූප (Mental State and Imagery) කියන ඇබින්දක් ගෙන, දෝලනය කර  (Oscillation)  උන්මාදයේ ධනාත්මක පැත්ත මතුකරන්න ගත් උත්සාහය, නිදහස් ආරේ පද එකතුවක් හැටියට පුදමි. උන්මාදය පොදුවේ පිස්සුවක්ම නොව.

උන්මාදය මුලින්ම අකුරු කාලේ ඉංග්‍රීසියෙන් Craze හැටියට, එම අදහස ගෙනෙන උන්මාදය පදපෙල පරිවර්තනයක්ම නොවේ.

අනුගත - Adapt

 

සැඩ හිරු මුදුනේ

කරටිය දවනවා,

පාමින් රැඟුමක් තාලෙට අතු

රැළිදියේ අඳිනවා,

පොඩි රළ පේළි ඇවිදින්

ඔච්චම් කරනවා,

දව දවා පෙලුවත් කඳ

ඉරු දෙසටම ඇදෙනවා,

දබර කුමටද අනුගතව විඳිමි

සොබවින් කියනවා.

පදපෙළට යොදාගත්තේ සොබාදහමින් කියාපාන මෙම සංකල්පය:

ස්වභාවධර්මය සමඟ ගැටෙනවාට වඩා ඊට අනුගතව ‘රැඟුමක’ යෙදීමට ඔවුහු ඉතා දක්ෂ ලෙස හැඩගැසී සිටිති.

They are masterfully adapted to dance with nature rather than fight it.

උණුසුම - Warmth

 

දැවෙටෙමින් හද පිරිමදින

රිද්මය දෙන, සුවපත් කරන

පෙළමින් වෙහෙසට පත්කරන

දව දවා අළු කර දමන

හීන්සැරේ බැසයන

සොඳුරු සිසිලස ගෙනෙන

සැඟව මුලු ගැන්වෙන

ශීත හිම සදන, හිම රකින

නපුර, උරණවෙන

හිම කඳු දිය කරන, වනසන

සොඳුරු සුහද,

රුදුරු සොඳුර,

සනහන දවන,

දවන සනහන,

නුඹ

උණුසුම.

සවන් දෙන්න උණුසුම ගීතය

තුතිමල් මිටක්: ලස්සන තනුව හා සිංදුව | Beautiful song done by Suno AI

The Breeze a pleasant wave of music | නැවුම් සුවඳ මුසු, ප්‍රසන්න මදනල නගන මියුරු ගී රාවය from ගල්මල්-Coral අඩවියෙන්

සිත්තරෙක් - The Painter

 

ජීවිතයම සිතුවම් එකතුවක්,

නුඹ සිත්තරෙක්...

කැමැතිම පාට තෝරාගෙන හැඩ කරන

වඩාත් කැමැති පාට හනි හනිකට ගෙවෙන...

අලුත් පාටකූරු පෙට්ටියක් අරගෙන

තව පිටුවක්, පිටු කීපයක්

නුඹ සතුටින් පාට කරන

ඇල්මක් නැති පාටම ඉතිරි කර...

සිතැඟි පිටුවෙන් පිටුව

ඔපකර පාටින් පාට

නුඹත් දන්නේ නැහැ

එකතු වෙන්නේ,

ඉතිරි වෙන්නේ,

ඇල්මක් නැති පාට පාට කූරු...

මඟෑරුනු පිටු,

නුඹේම සිතුවම්,

පාට කරන්නට කිසි තේරීමක් නොකර...

නුඹ, නුඹේම සිතුවම්

කැමැතිම පාටින් පාට කරන්නට,

බැරිවූ සිත්තරෙක්...

ජීවිතයම සිතුවම් එකතුවක්,

නුඹ සිත්තරෙක්...

ජීවිතයම පාටකූරු පෙට්ටියක්

සිතුවම් පාට පාටින් හැඩකර

ඇල්මක් නැති පාට ගොඩක් ඉතිරි කර

සිත්තරෙක්...

ජීවිතය සිතුවම් එකතුවක්,

පාටකූරු පෙට්ටියක්...

නුඹ සිත්තරෙක්

2021 ඔක්තෝබර් වලදී කල මගේ නිර්මාණයක් වෙන ජීවිතය පාටකූරු පෙට්ටියක් වාගේ පදපෙල ගීතයක් කරන්න ගත් උත්සාහයේ දී පොඩි වෙනසක් සහිතව කර නිර්මාණයක් සිත්තරෙක්.

සවන් දෙන්න සිත්තරෙක් ගීතය, අඩුපාඩු කියන්න.

තුතිමල් මිටක්: ලස්සන තනුව හා සිංදුව | Beautiful song done by Suno AI

නුඹ මඟෑරුනා - I Missed You Out

 

නුඹ මඟෑරුනා මට,

රළ මියගිය

සයුර සේ

තරු ද නිදි

අහස සේ

තුරු ලතා නැති

අරණ සේ

පෙති නැති

මල සේ

අත්තටු අහිමි

විහඟෙකු සේ

වචනයක් පවා නැති

වැකියක් සේ

ලියන්නට බැරි වූ

කවිය සේ

නුඹ මඟෑරුනා...

පදපෙල මියුරු ගීතයක් හැටියට සවන්දෙමු ද?

තුතිමල් මිටක්: ලස්සන තනුව හා සිංදුව | Beautiful song done by Suno AI

ප්‍රදීපාගාරය: අඳුරට එළියක්

 

විඳගෙන රළු රළ උපේක්ෂා

විදින රැස්කඳ අඳුර සිසාරා

කියන පාර ගල්පර බේරා

පතන නැති තුතිමල් කිසිදා

ඔරුපාරු සුවිසල් නැව් නැත කාරි

ලොකු පොඩි රළු රළ පේළි

එගොඩ මෙගොඩ පැද යන්නට බේරි

අඳුර දෙබෑකර විදිනා රැස් කාන්ති

පාමුල පෙණ පිඬු පිපී පරවෙන

හමන මදනල මාරුත එකසේ පිළිගෙන

ඉසව්ව නුඹේ ගිලුන ද අඳුරින

දල්වා පහන හද පතුලෙන් බැබළෙන

අප හැම තුල ඇත එළියක බලයක් 

දුක ගැහැට නෙක කරන අඩු වැඩියක්

විය හැකිය තවෙකෙකුගේ අඳුරට එළියක්

ලද නොලද වුව තුති මල් කළඹක්

ලබන්නට නොව ලබා දෙන්නට ආලෝකය

අඳුර දුරුලන ආලෝකය විහිදුවන ප්‍රදීපාගරයක් වෙන්න පුළුවනි අපි සැමට

the Lighthouse කියවන්න ඔබ සැමට ආරාධනා!

අයිස් කුට්ටියක් උඩ - The Tip Of The Iceberg

 

"නරක් වෙලා"

උගුල්ලපු දත

හරව හරවා බලනවා

දොස්තර

කීපවරක්ම ඔහුම පුරවපු

දත...

සයුරේ පාවෙන

අයිස් කුට්ටියක

දිය යට වෙත්ද කොච්චර

සඟවා ගෙන

බැලන්ස් කරන

කැප්ටන්!

ලුණු ඇබින්දක් ලෙස කොමාවක් ","

අවශ්‍ය තැන්වලදී එකතු කරගන්න

ජීවිතයේ Bookmarks

පිළිවෙළට පංති කර

අපිළිවෙලින් වැඩෙන

මතක මංපෙත් කියන බැඳීම්

සමුච්චිය.

තවරා මිහිරි සුවඳ

සොඳුරු මතක පින්තාරු කරන

උයන.

ඇදෙමින් බිඳීගිය සැබැඳි දිගේ

පැරැණි පිටු සොයන

වනය.

වෙනස් වෙන ස්මාර්ට් ලොවක

විරාමයේ සැරිසරන,

සීමාවක් නැති බැඳීම් පිළිගන්නා

සිතිජය...

පෙළීම - Tightening

 

පොඩ්ඩක් හරි කැරකේ නම් ඇණ මුරිච්චිය

කරකවමින් හැඩි දැඩි යකඩ මෙවලම 

තව, තව තද කිරීම සිරිතය,

හරියාකාරව සවි කෙරුම නෙවැ ඉලක්කය.

ජීවිතයේ කෙළවරක් නැති තැලීම් පෙළීම්

එවගේම වෙන්නැ'ති.

අවස්ථා දෙකේදීම

බිඳ-වැටිය හැකි සීමාවක් පවතී,

එනමුත් මුහුණදිය යුතුය,

දරාගත යුතුමය.

English Version: Tightening 

ආම්පන්න | Equipment (Motivational Poetry: say "I can")

ආම්පන්න | Equipment (Motivational Poetry: say "I can")
දරුවා, ඔබ ඔබව තේරුම් ගන්න,
සෑම ශ්‍රේෂ්ඨයෙකු සතු වූ හැම දෙයම ඔබ ද සතුව ඇත,
දෑත්, දෙපා, දෑස්
සහ නුවණ, පාවිච්චි කළොත් ඔබ බුද්ධිමත්ව,
මෙ ආම්පන්න වලින්මය ඔවුන් සැම ද පටන් ගත්තේ,
එනිසා

මුලපුරනු මැන එකසිත්ව, "පුළුවනි මට!".

බලන්න, හොඳින් බලන්න බුද්ධිමත් හා ශ්‍රේෂ්ඨ ඔවුන් දෙස,
ඔවුන් ද ආහාරය ගන්නේ පිඟානක,
පළඳින්නේ පාවහන ගැට ගසා ලේස් පටිය,
ලොවම පිළිගනි ඔවුන් එඩිතරය, කඩිසරය,
එනමුත්,

ඔබ ද සතුය සියල්ලම ආරම්භයෙදී ඔවුනට තිබුණා වගේම.

ඔබට ද පුළුවනි පටන් ගන්න විජයග්‍රහණයේ පෙළහැර - විස්කම් පාමින්,
ඔබට ද පුළුවනි ශ්‍රේෂ්ඨයෙකු වෙන්න - හිත ඇතිනම්,
ඔබ ද හොඳින් සන්නද්ධය -  තෝරාගන්නේ නම් ඔබේ සටනට,
ඔබ සතු පා, අත්, නුවණ හොඳින් පාවිච්චිකරන්න,
පිබිදුන මිනිසෙකුට, ශ්‍රේෂ්ඨ දෑ කරතෑකි,

ජීවිතය පටන් ගන්න,

මුලදී ඔවුන් සතු අමුතු යමක් නොවිය.

ඔබ අංගවිකලයෙකු, අසරණයෙකු කරගත්තේ ඔබමය, නැගී සිටිය යුත්තේ ද ඔබමය,
ඔබ තෝරාගත යුතුවේය තැන ඔබ සිටිය යුතු,
කියන්න ඔබේ ඉලක්කය,
ඔබ මොනතරම් සොයා බැලුවාද, සත්‍යය වටහා ගත්තේද?
දිවිය ජයගැනුමට ඇවැසි හැම දේ කිසි අඩුවක් නැතිව ඔබට තිළිණ කර ඇත,
එනමුත්,

තීරණය ඔබගේය, ඔබට කවුරුන් විය යුතුද?

දිරිය ගත යුතුවන්නේ ඔබමය,
ජයගන්න නම් ඕනෑකම මිනිසා තුළ තිබිය යුතුමය,
ඉතිං, දරුවා, ඔබ ඔබව තේරුම් ගන්න,
ඔබ උපන්නේ ද සෑම ශ්‍රේෂ්ඨයෙකු සතු වූ හැම දේ ඔබ ද හිමිකරගෙන,
ඔබ සතුය ආම්පන්න වලිනි ඔවුන් ද පටන්ගත්තේ, 
හඳුනාගන්න ඔබ, ඔබව,
පිළිගන්න,

කියන්න "පුළුවනි මට!"

Equipment poem by Edgar A. Guest
Figure it out for yourself, my lad,
You've all that the greatest of men have had,
Two arms, two hands, two legs, two eyes,
And a brain to use if you would be wise.
With this equipment they all began,
So start for the top and say "I can."

Look them over, the wise and great,
They take their food from a common plate
And similar knives and forks they use,
With similar laces they tie their shoes,
The world considers them brave and smart.
But you've all they had when they made their start.

You can triumph and come to skill,
You can be great if only you will,
You're well equipped for what fight you choose,
You have legs and arms and a brain to use,
And the man who has risen, great deeds to do
Began his life with no more than you.

You are the handicap you must face,
You are the one who must choose your place,
You must say where you want to go.
How much you will study the truth to know,
God has equipped you for life, But He
Lets you decide what you want to be.

Courage must come from the soul within,
The man must furnish the will to win,
So figure it out for yourself, my lad,
You were born with all that the great have had,
With your equipment they all began.
Get hold of yourself, and say: "I can."

* නිර්මාණ ගෞරවය මුල් නිමාණකරුවන්ට හිමිවේ.

ඇමෙරිකානු ජාතික Edgar A. Guest කවියාගේ නිර්මාණයක් වෙන "Equipment" කවියේ පරිවතනයකි. 1881 වර්ෂයේ එංගලන්තයේද් දී උපත ලද එඩ්ගාර්, දහවන වියේ දී දෙමාපියන් සමඟ ඇමෙරිකාවට පදිංචියට ගොස් ඇත. ඔහුගේ "Equipment" කවිය තරුන්‍යායට අමතන, දීරිමත් කරන (Motivational Poetry) වදන් එකතුවක් හැටියට පිළිගැනේ.

ආත්ම විශ්වාසය, සමාන විභවය සහ පුද්ගලික වගකීම උගන්වන ආශ්වාදජනක කවියක්, ඉතිහාසයේ ශ්‍රේෂ්ඨතම පුද්ගලයින් වගේම සමාන මූලික භෞතික හා මානසික ආම්පන්න සමඟින් සෑම කෙනෙකුම උපත ලබන බව පාඨකයන්ට මතක් කර දෙයි.

"ගැටවරය, ඔබ උපත ලබා ඇත්තේ සෑම ආම්පන්නයක්ම හිමි කරගෙනය, එහෙත් ඔබේ ඉරණම, ඔබේ ජීවිතයේ සාර්ථකත්වයේ තේරීම ඔබ අතය" යනුවෙන් සාරංශ ගතකරන්න පුළුවනි.

ps: Equipment යන්න උපකරණ, මෙවලම් හැටියට  ද ගත හැකිමුත් පරිවර්තනයේ දී ආම්පන්න හැටියට (බහුවචනයෙන්) යෙදා ගත්තා.

සැඳෑ අඳුර - The Twilight

 

මගේ පාමුල

මගේම සෙවනැල්ල

බොහෝ විසල්ව ඇඳලා

ඉරු බැස යනවා

සැඳෑ කල

අඳුරේ ගිල්වා

ඇලජිය - Emotional Allergy

දුටු විට,

නිදහසේ පියාසලන සමනළයෙකු

මතක්වි දළඹුවෙකු,

සුමුදු මල් පිරි කූඩලු පැළයක්

මතක්වි කහඹිලියා,

කසන්නේ නම්

ඇලජියක් මිස

වරද

පාට පාට

මල් පූදින පැලය ද

සමනළයා ද?

Note: Emotional allergy (චිත්තවේගී අසාත්මිකතාව) is an intense reaction to something in the present that reminds one, consciously or unconsciously, of an event from their history.

අහස - The Sky

 

නිල් පැහැති සිහිනයක් සේ,

අහස දිග හැරේ නිමක් නැතිව.

සුදු වලාකුළු නටන විට,

සිතත් පියාඹයි නිදහසේ.

උදෑසන රන් කිරණ වැටී,

බලාපොරොත්තුවේ නැවුම් මල් පිපෙයි.

සැන්ඳෑව දම් පැහැයෙන් සැරසී,

දවසේ කවිය නිමා කරයි.

රාත්‍රියේ තරු ඇස් දල්වාගෙන,

අහස කතා කියයි නිහඬව.

සඳ එළිය මඟ පෙන්වන විට,

ලෝකය නිදයි සැනසිල්ලෙන්.

අහස අසීමිත කැන්වසයක්,

ස්වභාවයේ සුන්දර චිත්‍රයක්.

බලන හැම මොහොතකම අලුත් වන,

අපගේ සිහිනවල සදා සගයා.

වරද මගේය - My Fault

 

ඈත අහසේ දිදුලන

පුංචි තරුකැට මුමුනන

සුමියුරු ගීයක් අරන් ආවා

සුමුදු මද නල

තනුව තාලය මන බැඳි

පදපෙල සොයමි කුමට ද

මිමිනුවා ඈත් කරමින්

දුහුල් රැලිපිලි

සඳ නෑගම් ගිහින්

හෙට අනිද්දා එන්නටවි අලුත්

ඈත, මුහුද රළ හඬ නඟයි

ගහ කොළ අතු අඹරමින්

පවන ඇයි නුඹ

රළු වුනේ මොහොතකින්

උදුරාගෙන ගියා

කුරුටු ගෑ කවි කොළයත්

සුළඟ නුඹට

දොස් කියන්නේ නැහැ

කවුළු දොර හැරියේ

මමයි රැවටී

දෙවෙනි පන්තියේ මකුළු කුමාරිය

 

පද්දලා සොලවලා

රජ ගමනක

ගාලු කුමාරිය

පැද්දි පැද්දී

දැළ වියන්නේ

දෙවෙනි පන්තියේ

ටිකට් අරගෙනැයි

මකුළු කුමාරිය...

වෙනස

 

පීරා තෙලින් ඔප

පෙළින් පෙළ සීරුවට

ඉන්නා කළු සෙබළු

අතරින් පතර

එබී බලනා

සුදු,

ඇයි මුරණ්ඩු...

* 98-99 විභාගයකට සූදානම් වූ කාලයේ පරිහරණය කල පොතක් අස්සේ තිබී හමු වූ පොඩි පදපෙලක්

තෙරපිය - The Therapy

 

අදත් බැරිලු කරන්න

අන්තිම තෙරපිය.

කීවතාවක් නම් කල්ගියා ද?

ඉන්නෙපයි වරුවක් එනකම්

ගමේ යන බස්සෙක

ඔන්න ඔහේ ඉන්නවා මෙතැනම.

මහා දානපති ගමේ මුදලාලි

සැරසිලා සුදෝ සුදු ඇඳුමින්

පිටව ගියා හීන් සීරුවෙන්

වහලා ඉමර්ජන්සි දොරටුව,

බලන්නෙපයි කටපුරා හිනාව.

රිදුම් දෙන ඇඟපත,

ඇවිදින ඇටකටු කූඩු,

ගිලුන දෑස් බලා හිඳී

අපේක්ෂාවෙන් එනතුරු වාරය.

පිච්චිලාලු පිලිකා වාට්ටුවේ මැසිම,

හරි පදමට පිච්චුනා ද

මුදලාලියේ මැණික් කැටය?