Friday, April 23, 2021

වරා මලක්


මඳ පවනේ පාවෙන
වරා මලක්
සිසිනිඳු සුදු කෙඳි බොකුටුව
ඔසවාගෙන පෑ සන්තිය
නිදැල්ලේ
ඉහළ පහළ බමනවා
රටා මවනවා
මෝරන සුළඟෙ වෙලි
ආලිංගනයක
ඈත ඈත ඇදෙනවා
වියරු සුළඟ
සැර වුනොතින්...
ලස්සන කෙඳි
වියැකුනොතින්...
නුහුරු යායක
නුඹ තනිවෙයි දෝ
බයත් හිතෙනවා...
එනමුදු නුඹ වරා මලක්
සසර ගමන නිදැල්ලේ යන
සැහැල්ලු වරා මලක්...

Sunday, April 18, 2021

ඉස්සර වගේම - Once Again

 


කොහේදෝ තවානක
හරි පරිස්සමෙන් වැඩුණ
කීඩාරම පිපුණේ 
දෙවසරකට පෙර
බක් මසේ දවසක…
දුගඳ පලුදු කළේ
තිරසට සිරසට සීරුවට යාවුන
සමාජ වියමන
පතුරුවා බිය සැක පැල්ලම...

කීප දිනකින් රමසාන් සඳ උදාවුණා
වෙනදා විලසින් එදත්
දන්නා කියන කාලේ පටන්
අපි බෙදාගෙන බිවූ
කන්ජි ටිකත් නිරස වුණා
නුහුරු දුගඳ ගලද්දි
තලා දෙඉවුරු
සැකය තටු අරන්...

රුදුරු කොරෝනා බූවල්ලා
වෙලා ගනිද්දි ගමරට
හිත් පිත් නැති ලෙසින්
කොවුලා ද ඉගිලුනේ එරමුදු අත්ත මඟෑර
රමසාන් සඳත් වහන් කරන්
ඇදුණා කළුවලා ගිලගෙන
තවත් වසරක අවුරුදු නුපුරුදු ලෙසින්...

ඔද තෙද පාන හිරු රජු
හිණි පෙත්තේ දැන් ඉතිං
අනේක දුක් ගැහැට මැද
පුරුද්දට බක් මල් පිපුණා
කැවුම් කොකිස් සුවඳ දීගෙන
අලුත් අවුරුද්ද ලබද්දි
පෑයුවා රමසානයේ නවසඳත්... 
කවුරු කවුරුදෝ හිස පැළැන්දුව
කටුඔටුනු පසෙකලා, 
ඉර බැස යන සොඳුරු සැන්දෑවක 
කන්ජි කෝප්පයක් බොමුද
ඉස්සර වගේම ආයෙත් ඉතිං...

සටහන:
කන්ජි (කැඳ, porridge) - දවසේ රමසාන් උපවාසයෙන් (නෝම්බු) මිදුන පසුව ආහාරයට ගන්නා වූ සම්ප්‍රදායීක කැඳ විශේෂයකි. ලොව පුරා මුස්ලිම්වරුන් අතර ජනප්‍රිය මෙම ආහාරය ප්‍රධාන වශයෙන් තිරිඟු ඇට යොදාගෙන පිසනු ලබයි. ලංකාවේ තිරිඟු වලට අමතරව රතු කැකුළු හාල්, පොල්කිරි ද එකතු කර පිසින (slow cooker) කන්ජි ලංකාවට විශේෂිත ආහාරයකි.

Friday, April 9, 2021

නිහඬ කඳු


දරාගත නොහැකිව පිපිරුණ
ලෝදිය වගුරමින් හඬන
බුර බුරා නඟින
කළු දුමාරය දුහුවිලි
වසාගෙන නිල් අහස
පුවත් මවන...

ඇතුළතින් ගිනි ගන්න
කැකෑරෙන ලෝ දිය මැඩලා ගෙන
පිපිරුනොතින්
කඳු පාමුල වැනසෙතැයි හිත හිතාම
හැම දේම විඳගන්න
දිරිය සවිය ඇති
උස් මිටි කඳු ද
බොහෝ ඇති
නිහඬව...

Saturday, April 3, 2021

ඔලිම්පියා තනිවෙලා


 
රතු, රෝස
මුවෙන් සිනා සිසී
කෙළි කවට කතා
නෙක මෝස්තර
හැඩ සුකුමාලියන් ගැවසුන
කන්තෝරුවේ
දොරකඩම බැබළුණ 
ටක් ටුක් දිගෑගිලි
විදුලි වේගෙන් විසිරුන
ලස්සන හැඩාකුරින් සැරසුව
ඔලිම්පියා
මුල්ලක කාන්සියෙන්
බලා හිඳී
ඉඳ හිට දකින
චෙක්පත එනතුරු...
යතුරු ලියන්නට