Wednesday, May 26, 2010

පාලම්


ගම් දනව් දෙස් සීමා
වෙන්කර ගලනා ගංඟා
එතෙර මෙතෙර යාකර
තැනුනා පාලම්

තදබද අඩු කරනා
රිය පෙළහර ගොඩ කරනා
එහෙන් මෙහෙන් තැනෙනා
පියාඹන පාලම්

ගුවනින් යන එන
උන්දැලා උස්සන බස්සන
සිරි සැප පිරි
ගුවන් පාලම්

උස් මිටි කඳු අතරින්
ඇද හැලෙන දියවැල් උඩින්
වැනි වැනි එක්වෙන
වැල් පාලම්

ඉරි ඇඳ පිල් බෙදි
දුරස්වන මිනිසුන්
ලං කර තැනෙන්නේ
කවදා ද පාලම්...

Saturday, May 22, 2010

පුංචි චාරිකාවක්

අද මැයි 22දා, අපේ රට "ජනරජ දිනය" සමරන වැදගත් දවසක්.

ශ්‍රී ලංකා දීපය 1798 සිට බ්‍රිතාන්‍ය අධිරාජ්‍යයෙන් වූ පාලනයෙන් නිදහස් කලේ 1948 පෙබරවාරි 4දා. එහෙත් බ්‍රිතාන්‍ය අධිරාජ්‍යයේ රැජිණ යටතේම පැවතුන රට 1972 මැයි 22 දා ජනරජයක් බවට පත්විය. දැනට භාවිතයේ ඇති ජාතික ධජය එලිදැක්වූයේ ද එදිනයි. තවද ජනරජ දිනයත් සමග අප රටේ ජනාධිපති තනතුරක් පිහිටවූවා, 1978 ආණ්ඩුක්‍රම ව්‍යවස්ථාවෙන් විධායක ජනාධිපති තනතුර පිහිටුවන තුරු එය නාමික ජනාධිපති තනතුරක් විය. (මෙ සටහන අද දිනට යෙදෙන "ජනරජ දිනය" ගැන කෙටි හැඳින්වීමක් පමණි)

අපේ රටේ අසිරිය නරඹන්න ගුවනින් "පුංචි චාරිකාවක්" යන්න ඔබට ඇරයුම.

කියවීමේ පහසුව තකා මෙ කවිපන්තිය ග්‍රැෆික් පිටු හයකින් යුත් ඉමේජ් ලෙස ඉදිරිපත් කර ඇත. ග්‍රැෆික් පිටුවක් මත ක්ලික් කරීමෙන් ඉමේජය විශාල කරගෙන පහසුවෙන් කියවීමට පුලුවන් වේවි.


පලමු පල කිරීම: 04-02-2010

Sunday, May 16, 2010

අපේ අත්කම් කලාව - Our Handicraft


හෑල්ලු කදුරු ලීය හරි හරියට
පදම් කර අපූරු හැඩ කපා
පාට සායමින් ඔප කර පන පොවනා
වෙස්මුහුණු කලාව

දැඩි සවිමත් කළුවර කඳ
කපා හැඩකල තනා රැල
බැඳ මෙල්ලම් කල
අලි කපනා කලාව

රත්වී දියකර ඉටි පින්සල
ඇඟිලි තුඩින් රූමත් කර
පාටින් හැඩ වැඩි කර සළුපිලි පට
බතික් කලාව

බංකු පොඩ්ඩක කැරකෙන
සූක්ෂමව ගලපා පහලොස් තිස්
හූයන් වියනා මනරම් රෙන්ද
බීරළු කලාව

මඩ ගොඩකින් නෙලා ගෙනා
පන්කොළය පදම් කර පාට කවා
රටා පැදුරු විසිතුරු දෑ කරනා
පන්වියනා කලාව

කාලයක් පුරා දස්කම් විස්කම්පා
පරම්පරා ගනනාවක් සුරැකුන
මෙදා මහළු අයම වෙහෙසෙනා
අපේ අත්කම් කලාව

විදෙස් සංචාරක කාසියම පතා
දහඩිය හෙලන අත්කම් ජනයා
ගෙවුන අමාවක කල රැක්කේ
පුද්ගලික සමරු විකුණුම් හල

වෙහෙසුන දෑස් යොමුකර
බලා හිදී නැග එන ඉර
ගෙනෙනා කහවනු බර
නොකරන් එය ඉඩෝර

අනේ එත්
යනදා ඔවුන් ගමන යායුතු
යයිදෝ අත්කම් දැනුමත් අප සතු

පොත් මිටියට ම යටවුන
පෝලිමෙ ම එක්වෙන
යොවුන් සිත් පිබිදේ නම්
තුරුලට ගෙන ශිල්පය

එක්කර නව සිතුවිලි
පැද යන්නට නව රළ
නියම අත්වැල
අපේ අත්කම් කලාව

රැකගමු
අපේ අත්කම් කලාව


මෙය ශ්‍රී ලංකාවේ අත්කම් කලාවන් අළලා කල කොටස් දෙකකින් සමන්විත විමසුමක අවසන් කොටස වේ.

පලමුවැන්න "බීරළු රේන්ද කලාව - Galle Lace":
බීරළු රේන්ද කර්මාන්තය ශ්‍රී ලංකාවේ දකුණුදිග වෙරලාසන්න ප්‍රදේශවල දකින්නට ලැබෙන අත්කම් කර්මාන්තයකි. ගාළු ලේස්, බීරළු ලේස්, පෘතුගීසි ලේස් යන නම්වලින් ද ලොව ප්‍රසිද්ධ එම නිමැවුම ඈත ඉතිහාසයකට උරුමකම් කියයි. පෘතුගීසීන් විසින් මීට වසර 600 කට පෙර බීරළු කර්මානතය ගාල්ල අවට ප්‍රදේශයේ හදුන්වා දුන් බවත් ඈත ඉතිහාසයේ ගාළු වරාය මූලික කරගෙන ලොව නන්දෙසට බීරළු රේන්ද සැපයූ ප්‍රධාන වෙළඳ මධ්‍යස්ථානයක් ලෙස ලංකාව කීර්තියක් අත්පත් කරගෙන තිබූ බව සඳහන් වේ. වැඩි විස්තර මෙතැනින් කියවමු.

පලමු පල කිරීම: 11-02-2010

Thursday, May 13, 2010

බීරළු රේන්ද කලාව - Galle Lace


කොට බංකු පොඩ්ඩක සවිකල
මෙත්ත පුංචකින් සැපවත් කල
කැරකෙන බණ්ඩි බැරලය බොබිම
එල්ලා ලී හැඩකර බීරළු මැෂිම

මොස්තරය හිතේ සිත්තම් කර
ගැට ක්‍රම විදි තෝරා ගෙන
නිමවුමට ඔබිනා නූල් පට ගැන
රූපරේඛාවන් එස්බිසලය කර

සවිකර මොස්තරය බොබිමේ
ඇල්පෙනිතෙන් සටහන් කර
ඔබින පහලොස් තිස් නූල් පට මැන
බීරලු පොඩි සකාසා ගෙන

කඩිසර දෑතින්නේ
බීරළු පොඩි සීරුවට ගෙනෙමින්නේ
අතිනතට විසිවෙන්නේ
සියුම් ගැටයක් ඇතිවන්නේ
රේන්ද මොස්තරයක් මතුවන්නේ

පෘතුගීසි කාලේ සිට පැවතෙනා
බීරළු ගෙතුමත් හරි අගනා
ගාලු ලේස් ලෙසිනා
පිටරැටියන් මන බදිනා...

සීමාවී අද ගාලු පුරේ
මහළු අම්මලා ගොතනා
යල්පැන ගිය කලාවක්
පණ අදිනා...

බීරළු රේන්ද කර්මාන්තය ශ්‍රී ලංකාවේ දකුණුදිග වෙරලාසන්න ප්‍රදේශවල දකින්නට ලැබෙන අත්කම් කර්මාන්තයකි. ගාළු ලේස්, බීරළු ලේස්, පෘතුගීසි ලේස් යන නම්වලින් ද ලොව ප්‍රසිද්ධ එම නිමැවුම ඈත ඉතිහාසයකට උරුමකම් කියයි. පෘතුගීසීන් විසින් මීට වසර 600 කට පෙර බීරළු කර්මානතය ගාල්ල අවට ප්‍රදේශයේ හදුන්වා දුන් බවත් ඈත ඉතිහාසයේ ගාළු වරාය මූලික කරගෙන ලොව නන්දෙසට බීරළු රේන්ද සැපයූ ප්‍රධාන වෙළඳ මධ්‍යස්ථානයක් ලෙස ලංකාව කීර්තියක් අත්පත් කරගෙන තිබූ බව සඳහන් වේ.

එහෙත් මෑත යුගයේ බෙහෝ දුරට සංචාරක කර්මාන්තය මත යැපෙන හස්ත කර්මාන්තයකි. පසුගිය කාලයේ සංචාරක කර්මාන්තය වැටී තිබුණාවූ අභාග්‍යමත් තත්වය හමුවේ දී ද මෙ කර්මාන්තය පණ අදිමින් හෝ රැකුනේ කුඩා පරිමාණයේ පුද්ගලික අංශයේ දායකත්වයෙනි. එය බොහෝ විට දශක ගනනාවක් කර්මාන්තය හා ඔවුන් අතර තිබූ බැඳීමේ සහජිවනය වෙන්න පුලුවනි.

විදේශ සංචාරකයින්ගේ පැමිණීම වැඩිවීමක් දකින්නට ලැබීම අත්කම් කර්මාන්තයන්ට යහපතක් වෙනු ඇත. එහෙත් බීරළු රේන්ද ගෙතීම මෑත කාලයේ මහළු අම්මලාට සීමාවූ කර්මාන්තයක් බවට පත්ව ඇති නිසා එහි දිගුකල් පැවත්ම අනතුරක් අඟවයි. තරුණ උදවිය මෙවන් කර්මාන්ත වල නියැලීමට මැලිකමක් දක්වන්නේ විවිධ සමාජීය-ආර්ථික හේතූන් නිසා වෙන්න පුලුවනි.

බීරළු ගෙතීම පාරම්පාරික කර්මාන්තයක් සේ බැලූ බැල්මට දිස්වුවද එය උසස් නිර්මාණ ක්‍රම යොදාගන්නා කලාවකි. රේන්ද මොස්තරය ප්‍රස්ථාර කොලයක ඇඳ (මෙය රූපරේඛාවන් - graph යන යෙදුමෙන් නිර්මාණයේ සඳහන් කර ඇත), කාඩ්බෝඩ් පටියක සලකුනු කර වියුම හැසිරවිය යුතු ආකාරය අධ්‍යයනය කර එසදහා ඇල්පෙනෙති යොදා සකසන එස්බිසලය (අච්චුව හෙවත් ස්ටෙන්සිලය) බීරළු කලාවේ උසස් නිර්මාණත්මක තත්වය මොනවට පැහැදිලි කරයිද?

නව තාක්ෂණය, නව අදහස්, කාලීන නිර්මාණ හා වෙළඳපොලේ නැඹුරුතා ආදිය සැලකිල්ලට ගෙන මෙ වටිනා කලාව වැඩි දියුණු කරන්නේ නම් මීට වඩා ආර්ථික ප්‍රථිලාභ ගෙනෙන, යොවුන් උදවිය ඇද බැද තබගැනීමට සමත් හස්ත කර්මාන්තයක් වෙනු නොඅනුමානයි.

එය සියවස් ගනනාවක් නම රැන්දු ගාළු රේන්ද (Galle lace) කලාව සුරකිනු ඇති. නූතන ලෝකයේ පරිසරය-රකින මත ප්‍රවණතා වලින් මෙවන් පරිසර-හිතකාරී (eco-friendly) කර්මාන්ත ආර්ථික වාසි අත්පත් කරගෙන ඉදිරියට පියමනිනු ඇත.

ලන්ඩන් නුවර මූලිකව Powre of Hands Foundation ආයතනය අපේ බීරළු රේන්ද කර්මාන්තය උදෙසා කාර්ය භාරයක් ඉටුකරන ආයතනයකි.

මෙය ශ්‍රී ලංකාවේ අත්කම් කලාවන් අළලා කල කොටස් දෙකකින් සමන්විත විමසුමක පලමුවැන්නයි. දෙවැන්න "අපේ අත්කම් කලාව" ඉදිරි දිනකදී කියවමු.

පලමු පල කිරීම: 10-02-2010

Friday, May 7, 2010

ලොක්කයියේ


නුඹේ අළුත් කමිසය මදින
ගැලවී ආවේ බොත්තම අකුරු බොඳවුන
මතකයක් නැත දිනකුදු කී වග නුඹ ලෙඩින
අටකට නැමී හැංගිලා පොකට්ටුවෙ හිඳින
තුණ්ඩුව කියයි පෙත්ත සිව් වසරක් ගිලින

ලොක්කා නුඹයි හැමදා මුදුන් ලීයට උරදුන
ලැබුනද නිදහස දුව පැන ඇවිදින
කොටුවනා මායිම් වැට හරියට තනමින
රැක්කා දිය යුතු ඔවදන පළමුව යහමින

කුප්පි ලාම්පු එළියෙන් දුටුවේ දුර ඈත
ජයගෙන පැන වටකර මිටියාවත් ගෙන මෑත
තඩි රූස්ස ගස් පරයා නගින්නට පෑ දෑත
වැටෙන හැම වරෙක ලංවූයේ ඈතත් කර මෑත

බිඟුවෙකි පියාපත් නැතත් දැනුමට ඇදුන
කඩියෙකි දෙපයට වෙහෙසක් නොදැනුන
කුඹලෙකි මැටි බිදුගෙන පවුරුන් මැවුන
කූරෙකි පොඩි සමුදුර ජයගෙන ඈතක් ඉඟිලුන

හිසට නිවහනක් ඇති කර දුන්
නැතුවා අඩුවක් හැම සරි කර දුන්
නුඹට උරුම දුක් අපට නො දුන්
ඉහළට යන්න මඟ පාදා දුන්
කිම කලේ නුඹ නුඹව කොන්

මග පෙන්වූ වන ට පින් දෙන නුඹ
මග ඇසිරු වන ට මෙත් කල නුඹ
වාරු නැති උන ට අත දෙන නුඹ
සිත නැති ද සිතන්න ට ගැන නුඹ

අඳුරට එළිය දෙමින් වෙහෙසුන
මහ බල උස ප්‍රදීපාගාර කුළුන
එක්ටැම් ගෙයක් ලෙසින
තනිකලේ කවුරු ද මහ රජුන
කිම වෙහෙසන්නෙද වියපත් තටුන
මිදියන් සැරිසරන්නට ගස් මල් පිරි උයන

පිඹිඳෙන් ලොක්කයියේ බේරාගෙන
මහත් සිත නුඹ උගස් කල

වසර ගනනාවක් මැදපෙරදිග දේශවල රැකියාව කරමින් ඉන්න මට නොයෙක් පුද්ගලයින් හමුවී ඇත. තම පවුල්ව බර කරපිට පටවාගෙන තම යව්වනය උගසට තබා මේ කර්කෂ පරිසරය සමඟ ඔට්ටු අල්ලන ඔවුන් අයියලා, අක්කලා, නංගිලා හෝ මල්ලිලා කියා වෙනසක් නැත. උත්සාහයෙන් ජීවිත සටන තරණය කර පවුල් නවුකාව එතර කරන්න සටන් වදින ඔවුන් සැබෑ විරයන්ය. එහෙත් ඒ වන විට ඔවුන්ගේ ජීවිත හෙම්බත්වී අසරණ වෙලා...

එවන් සොයුරන්, සොයුරියන් ගැන විමසන නිර්මාණ කිරීමට ම සිත බලපෑම් කරද කතාවස්තුව හා ඔවුන්ගේ අනන්‍යතවය තුළනය කරගෙන එවැන්නක් කිරීමෙ අභියෝගය සුළු පටු නොවේ.

ලොක්කයියේ නිර්මාණය එවන් යෝධ චරිතයක් ඇති සරළ මිනිසෙකු වටා ගෙතුන සත්‍ය කථාවකි. මාස ගනනාවකට පෙර පටන් ගත් මෙ නිර්මාණයේ කටයුතු විවිධ හේතූන් නිසා පමාවට බඳුන් විය. එහෙත්, චේජනා නංගී පියගුණ විදහා පාන පදවැලක් (මෙතැනින් බලන්න) ගෙනෙමින් කල ආයාචනය "පෙම් කවි ලියනා කිවිවරුනේ සුපසන්... සොයුරු පෙම ගැන නව කව් ගී පවසන්" ලොක්කයියේ නිර්මාණයට නැවත ප්‍රමුඛත්වයක් දෙන්න හේතු විය.

මෙ පිදුම සෙනෙහසින් සෙනෙහස අකුරු කරන චේජනා නංගීට.

Wednesday, May 5, 2010

පුංචි ලෝකය


පීරා ලොව ගූගල් සොයන්නේ
සුවඳ නැති හසුන ද ඊ-මේල් කරන්නේ
සුබ පැතුමත් ටෙක්ස්ට්කර යවන්නේ
කුඩා වෙලාම ද ලොව පවුරුන් තැනෙන්නේ

පලමු පල කිරීම: 14-02-2010


Saturday, May 1, 2010

ටී ටයිම්


ලස්සන කේක් කෑල්ල පුරා පාට පාට කෑලි. ෆෘට්ස් ලු.
පාට විතරයි වෙනස, පාට කවා වේලපු පම්කිං කෑලි.

තේ කොප්පයේ මැස්සෙක් පීනනවා පණ බේරගන්න.

වේටර් ටිප් එක බාගන්න විසිකල බිලීපිත්තට නෝට්ටුවක්
අමුණා ගැනලා දීපු පරණ පත්තර කෑල්ලෙන්
මුව පිසලාගෙන පිටවෙනවා.

නෝ ටී.

පම්කිං - වට්ටක්කා