Saturday, March 27, 2021

උදාවෙනතුරු - Awaiting

 


අන්තිම කොළ ටිකත් හැලී ගිය
අතු ඉති කිනිති අග
දළු කොළ මල්
දකින පැතුම,
වාරය

Friday, March 19, 2021

ගිනි කන්ද


දරා ඉන්නැති
ගොඩාක් සෝ සුසුම්
යට කරගෙන
බැරිම තැන
පිපිරෙන්න'ති
කදු මුදුනත් දියකරගෙන
ලෝදිය
කල්ප කාලයක් ගතවි
නිවුනොතිං
කඳු පාමුල
පාෂාණ
බොහෝ දේ ඇති
ගල් ගැහුණ
දැවී අලුවී
සුළඟේ විසිරුන ද
පෙළක් වදන් ඇති
අවතැන්ව
බැරිව පෑහෙන්න…

Friday, March 12, 2021

වටාකුරු නොවෙත් උල්කටු


අකුරු වටකුරු
යාකර වචන විසිතුරු
සීරුවෙන් හදන පේළි නිරතුරු
රසය මතුකර යටකෙරු සිත්තම නිරතුරු
විය නොවිය හැකිය පියකරු

පුරුක පුරුක යා කර
රන් දම ගොතන්නේ
අබරනකට මිස දිලෙන
කසයකට නොව තලන

තුඬින් තුඬ ගෙන පද
මිණි කැට ඔබවන්නේ
ඔපයෙන් බබළනු රිසි පදවැල
රිදවුමට නොව සූරන
 
සුන්දර සිහළ බස සරු සාර
නන් රැසින් දිලේ වදන් වන් ඔප මිණිකැට
දෙසින් දෙස බලන මානය
පැහැ රැස වඩන්නේ නෙත් සිත් කෝණය

සුරැකිව වැවුණ ද වැට ඉම අතර
පද මල් පිපෙන්නේ අහස් කුස යට
මලේ රූ රස ගුමු ගුමු බඹරුනට නොවෙද
සදොස් වෙතොත් කියනු මැන සබඳ
වටාකුරු මොටද වෙන්නේ උල්කටු…

Tuesday, March 9, 2021

ඇය තනිවම

 

ගිගුරුම් දුන් වේදිකා නිහඬය
ඔවුන් බැස යන්ට ඇති
සුවඳ දෙන තවත් දින දසුනක්
එක්ව එන්නට...
ලාදළු නෙලා තේ කූඩේ පුරවන
කිරි පිහියෙන් රබර් උනන
ගල් කෝරියේ දුක තලන
රෙදි මිටියෙන් මෝස්තර මහන
ඉඳිකටුවෙන් මල්‍රටා මවන
බීරළුවෙන් ගෝල්-ලේස් ගොතන
හම් කැබැල්ලෙන් ලස්සන පා සරසන
ඉටි බඳුනෙන් බතික් රූ රටා අඳින
මුව පිරි සිනාවෙන් අවන්හල බබළවන
සුපිරි සැලේ මී මැස්සිය
කතරක නෙක ගැහැට විඳගෙන
රන් කහවණු ගෙනෙන
තඹ දොයිතුවකුදු නොපතන
වැඩමුර මුරලයිස්තු කිසිත් නැති ගෘහණිය
වසර පුරා ඇය
ඇගේ වේදිකාවේ තනිවම.

Sunday, March 7, 2021

හිරකර මිදෙන - Fizzy Trap

 

බෝතලය නැමුණි
උඩඟු හිස් වීදුරුව වෙතට
හඬ දෙමින් පිරුණි
පාට දී හිස්වෙමින
ලහි ලහියේ ඇදුනි
වා බුබුළු පෙළින් පෙළ මතුපිටට
හීන් පොප් හඬින් පිපුරුනි
මිදී නිසල අහසට
බලෙන් මුසුකර
අංගාරය පංගුවක්
පාට සායම් රසකර බිම
පිළිගන්වා නුඹට...