Wednesday, May 26, 2021

පාදමේ හිරකර - Presser Foot

 


නූල් පට හරි සීරුවට අමුනලා
හැඩ කපපු රෙදි පොට පිළිවෙළට
නූල් පාදමේ හිරකර
දම් දහම් සිහිකර
නඟේ නුඹත් දුවනවා
මෝටරයේ වේගයෙන්ම
මෝස්තර පිළි මැවනවා...

කප්පරක් දුක් ගැහට මැද
ජීවන බර කරපින්නා ගෙන
මහ මෙරක් තරණය කරනවා
මල් මල් සිනා මැද
නඟේ නුඹේ සිහිනය
හැම දේදුන්නකම ඇඳෙනවා
පඩි පත එය මකනවා...

ඈත එපිට රට රටවල
රන් කහවණු ගේනවා
ඇති හැකි උදවිය බැල්ම ලබනවා
කම්මලේ දහඩිය සුළඟේ වේළුනාට
මුතු පබළු පංතියේ දිලෙනවා
දනට පිනට පිදෙනවා
ගරු සැලකිලි ලබනවා...

රෝ බිය මර බිය මැද  
අසරණකම යකඩ පාදමේ හිර කර
උන් කර පිට කම්හල් දුවනවා
අසරණ උන් තනිවම
හඬනවා, ගැහෙනවා
අනේ අපි
නිදහස්ය, නිවහල්ය කියනවා...

පාදම - Presser Foot : මහන මැෂිමක මැස්ම නිසියාකරව යෙදීම සඳහා රෙදිකඩ තදකරනු ලබන උපාංගය/කොටස

නිමිත්ත: රෝග බිය පැතිරෙන කාලයක අපනයන නිපැයුම් අංශයක් හැටියට ගැනෙන ඇඟලුම් කම්හල්වල කොටු වූ පිරිසගේ ජීවිත

Sunday, May 16, 2021

ජීවිතයේ වැලි ඔරලෝසුව

 


දුක සැප යස අයස ජීවිතයේ
වැලි ඔරලෝසුවක් වගේ
දුක් දොම්නස පිරි ජීවිතයේ
වැලි හෙමිහිට රූරා වැටෙන්නේ
දුක් කම්කොටළු ජීවිතයේ
ගෙවෙනවාය සිතෙන්නේ
හිස් වෙද්දී වැලි කුටියේ
උඩු යටිකුරු කරන්නේ
එවැළිමය කල් අරගෙන
සීරුවට
ඉහළ පහළ හැලෙන්නේ
වාසනාව යදින්නේ...

Friday, May 7, 2021

වරම් යදින ජීවක

සඳවත ගලන රැයක
අමාවක අඳුරක
තරු එළි තනි නොකළ
නොනිදි පුරවරයන්
වෙලා ද විසාලාවන් තැන තැන
නගරය අවට…

ඈත නිරිතදිග සිට
මහ රෝහල වෙත උඩහ
පිවිසුමෙ නිවහන
උන්නත් පරිස්සමට
තොරතෝංචියක් නැති
ගිලන් සයිරන් හඬ
ඉඩ ඉල්ලනවා බැගෑපත්ව
වරම් යදින ජීවක
අඟුළුලෑ ජනේලය ළඟ
සුවපත් වේවා පතනවා
දම් දහම් සිහිකර...

සැඳෑ අඳුර ඉරාගෙන
ගිලන් රිය දුවන්නේ උඩහට ද
නොදැන සැක
සුවපත් වේවා කියනවා පුරුද්දට
තද කරගෙන කඳුළු කැට
පළාතේ සැතැපෙන අරණ
පාර පහළට…

පිළිපැද සුවසෙත ඔවදන් හොඳින්
පරිස්සම් වෙන්න ඔබ
සමඟ ස්නේහවන්තයින්
ආරක්ෂා වේවා
ජීවිත ජීවත් කරවන්න වෙහෙසෙන
ජීවිත හැම…

* නගරය, ගාල්ල

Tuesday, May 4, 2021

පිවිතුරු අමිල ඔක්සිජන්

 

සිරුර පුරා හැම අහුමුලු වෙත
දිවෙනා රතු රුහිරු
සමඟ වෙලී ඇඳී ගොසින් පුබුදුවනා
ජීවය, ඔක්සිජන්

සිඟිති හදවත රිද්මය ලද දා පටන්
සතොසින් දිවෙන, විඩාබර විටෙක හතිලන
විකසිත සුමුදු කුසුමක සේ අවයව
සුරකින, ඔක්සිජන්

නැතිවිට සැපයුම හරිහැටි අඩපණ වෙන
පරවෙන කුසුමක් සේ සැණෙකින් මැලවෙන
සියොළඟ වේදනාවෙන් පෙළෙතෑකි
නැතිවම බැරි, ඔක්සිජන්

පිය සබඳ... පුංචි විවේකයක් ගන්න
මොහොතක් දෑස පියාගෙන සන්සුන් වෙන්න
ගැඹුරු හුස්ම පොදක් ගන්න
දැනෙනවා නේද
පපු කූඩුව ඉහළ පහළ යන තාලය
ඇසෙනවා නේද
විරාමයක් නැතිව හදවත ගැහෙන රිද්මය

ඒ පුංචි පොම්පය, ඔබේ හදවත
ලහි ලහියේ බෙදනවා රුහිරය හැම දෙස
මුසු කර හුස්ම පොදින් බිඳෙන් බිඳ
උරාගෙන, ඔක්සිජන්

නොනිමි ඉල්ලුම නිරතුරුව සපයන
පෙනහලු පපු කූඩුව තුළ වෙහෙසෙන
අර ගන්නට හුස්ම පොද පණ නල
රකින, ඔක්සිජන්

දුබලව පෙනහලු ලෙඩ වුනොතින්
ගන්නේ කෝමද හුස්ම පොද
රැකුමට සිරුර අවයව හයිකරන්නේ බට
සිලින්ඩර, ඔක්සිජන්

එපා, එපා වෙන්න කලබල
අරන් තියගෙන රැස්කරන්නට සිලින්ඩර
එපා, එපා ඩැහැ ගන්නට
දුබල රෝගියෙකුගේ තව මොහතක හුස්ම
අයිතිය, ඔක්සිජන්

පිළිපැද සුවසෙත ඔවදන් හොඳින්
පරිස්සම් වෙන්න ඔබ සමඟ ස්නේහවන්තයින්
රැකගන්න ඔබේ පපුව තුළ ගැහෙන මහඟු තිළිණය
සත්තයි නිරතුරුව ලබා දෙනු ඇති පිවිතුරු 
අමිල, ඔක්සිජන්

නිමිත්ත: මෙදිනවල පැතිරෙන කොරෝනා රෝග බිය වගේම අසල්වැසි ඉන්දියාවේ මෑතක දී ඇති වූ තත්වය හේතුවෙන් මෙඩිකල් ඔක්සිජන් සැපයුම පිළිබඳව ඇතිවිය හැකි පැනික් තත්වය