ඇන්ඩෘ හා සොෆියා දෙදෙනා කීප වතාවක්ම ඇවිත් නතර වුණේ දියඇල්ල ආසන්නයේ පොඩි හෝටලයේ. උදේ ආහාරය අරගෙන හෝටලයෙන් පිටත්වෙන ඔවුන් ඒ අසල ඇති වන ලැහැබේ, කඳුගැට වල ඇවිදින්නට බොහෝ කැමැත්තක් දැක්වූවා. දවසේ වැඩි කාලයක් විනෝදයෙන්, කෙලිදොලින් එහෙ මෙහේ ඇවිදින ඔවුන් හවස් වෙලා නැවත කාමරයට එන්නේ ඔවුන් වෙනුවෙන් බලා ඉන්න නැවුම් පලතුරු වට්ටිය බලාපොරොත්තුවෙන්. හෝටලයෙන් ලබාදෙන දවසේ නැවුම් පලතුරු වලට අමතරව මෙ දෙදෙනාගේ කාමරයට වැඩිපුර යමක් ලැබෙන්නට විය.
මෙවර ඔවුන් ආවේ ඔවුන්ගේ මධුසමය ගෙවීම ප්ලෑන් කරගන්නය. ඇන්ඩෘගේ කැමැත්ත වුණේ මුහුදුබඩ පෙදෙසක් තෝරා ගැනීම වුණත් ඔවුන්ගේ පළමු හමුවීම, ආදර කථාවේ රසමුසු තැන්, සුවඳින් පිරුණ, මේ දියඇල්ල ආසන්නයේ පොඩි හෝටලයම තෝරාගන්න සොෆියාගේ කැමැත්ත විය. ඇය දියඇල්ල කඩා හැලෙන පහළ කොටසේ නෑම විතරක් නෙවෙයි ගංඟාව ඉහළ සිට ඇදී එන සුන්දරත්වය, ගංඟාවේ ගීතය, ඒ දෙපස වන වදුලු වල කුරුලු කිචි බිචිය ගොඩාක් අලුම් කරා. හැබැයි, ඇයට උවමනා වුණා මෙතෙක් ඔවුන් වැඩියේ නොගිය ගංඟාවෙ උඩහට වෙන්න පිහිටි සුන්දර තැනක මධුසමයේ වැඩි කාලයක් ගත කරන්න. වෙනදාට වඩා උදෙන්ම හෝටලයෙන් පිටත් වූ ඔවුන් හෝටලයෙන් සොයා දුන් ගමන් සඟයෙකු ද සමඟ ඉදිරියට ඇදෙනවා. කෙළිලොල් සොෆියාගේ උනන්දුව, පරිසරයට ඇති පෙරැත්තය නිසාම දුවන පනින ඇයට රුකුල් දෙමින් විඩාවක් නොපෙන්වා ඇන්ඩෘ ද සෙවනැල්ලක් වගේ ඇය පිටුපසින්ම වැටුණා. ඇන්ඩෘ තම ගමන් සඟයා සමඟ යමක් කතා කරමින් රැඳුන මොහොතක පහළ ගල්තාලා අතරින් හැඩ දමමින්, ලතාවට ගලන ගඟ නඟන හඬ කල ආරාධනයට වසඟව දිවගිය සොෆියා ගල්තලාවකින් ලිස්සා ඇද වැටුණේ බලාපොරොත්තු නොවූ විදියට.
සුන්දර සිහින සමුදායකින් පිරි ඔවුන්ගේ මෙවර ගමන කෙළවර වුණේ අවාසනාවන්ත විදියට.
ඇය මාස ගනන්වක් රෝහලේම ගතකර ජීවිතයෙන් සමුගත්තේ ඇන්ඩෘ මෙලොව හැමදාම තනි කර.
එනමුත්, ඔහුට ලැබෙන නිවාඩුව ගත කරන්නට ඇන්ඩෘ දියඇල්ල ආසන්නයේ පොඩි හෝටලයට එන පුරුද්ද අතහැරියේ නැහැ. සොෆියා සමඟ ඔහු අවසන් වරට සිටිය කාමරයම ලබාගන්න ඔහු වග බලාගත්තා. සොෆියා සමඟ ඇවිදි ගිය වන ලැහැබ, තුරු වදුල, ගං ඉවුර ඔහු වඩාත් ප්රියකලා, තනිව සක්මන් කලා.
පෙම්වතුන්, සොබාව පරිසරයට ළැදිකම් දක්වන අය (Nature Tourists), තනියෙම ජීවිතය විඳින්න එන සොලෝ ටුවරිස්ට්ලා (Solo Tourists) අතර පොඩියට, පිළිවෙළට පවත්වා ගෙන ගිය දියඇල්ල ආසන්නයේ පොඩි හෝටලය වඩාත් ජනප්රිය තැනක් වෙනනට විය.
සාරා උදෙන්ම චෙකින් වූ තැන්පත්, පියකරු සොලෝ ටුවරිස්ට් කෙනෙක්, ලහි ලහියේ දියඇල්ල පාමුල නාන්න ගියේ පහුව දා උදේට ගං ඉවුර දිගේ උඩහට ඇවිදින්න යන්න ඕනේ... උපදෙස් පත්රිකාව හවස් වෙද්දි සූදානම් කරලා තියන්න කියලා. ඒකත් කවුන්ටරයෙන් අරන් ආපහු කාමරයට ගිය සාරා... සැණකින් බය වෙලා වගේ දුවගෙන ආවේ "කවුද මගේ කාමරයේ බාත් රූම් එකේ නන්නේ..." කියමින්.
ස්ටීව්, රූබි යුවළ හුරතල් දූ පොඩ්ඩ එක්ක ආවේ දියඇල්ල බලන්න, දවස් තුනක දිග සති අන්තය ගතකරන අදහසින්. පළමු දිනයේ ඔවුන් ඇවිදලා කාමරයට එද්දි "පලතුරු බාස්කට් එක මාරු කරලා නැහැ". ස්ටීව් පැමිණිලි කර පසුව අලුත් පලතුරු පුරවපු බාස්කට් එකක් ඔවුන්ට ලැබුණා. රූබියි, දරුවයි මහන්සියට නිදාගත්ත ද වහලා ඇති බැල්කනි දොර අතරින් එන අමුතු හුළඟ, තිර රෙදි ඈත් මෑත්වීම ඔහුට කරදර කරමින් නින්දක් නැති විය. මනස්ගාත... ඔහු හිත හදාගන්න උත්සාහ කරා. පහුවදා, ගඟ ඉහළට ඇවිදින්න ගිය ඔවුන්, දුව කුරුලු කීචි බිචිය විඳින අයුරු බලාගෙන හිටියේ හරිම සතුටින්, හෙමිහිට ගලන ගඟේ සිසිල් දිය පහාරේ පාද ගිල්වා සිටියේ සනීපෙන්. "ඩැඩී ගඟේ පීනන මාලු නැද්ද දුව අහනවා" රූබි එබිකම් කර කියනකම් ස්ටීව්ට ඇහුණේ නැතිවා වගේ. ගෙවුණ රාත්රියේ කාමරයේ අත්දැකීම ඔහුගේ හිතට කරදර කරන්නට විය. සතුටින් දවස ගෙවා ආපසු කාමරයට එද්දී එදාත් පලතුරු වට්ටියේ එහෙන් මෙහෙන් කාපු පලතුරු... තරහින් වෙවුලන ස්ටීව් ෆ්රන්ට් ඔෆීස් එකට ගිහින් කෑගහන්න පටන් ගත්තා.
ගොල්ෆ් පිස්සෙක් වූ රොබට් ගුවන් සමාගමක වැඩකළ තනිකඩයෙක්. නිවාඩුවක දී දවස් ගණන් ගොල්ෆ් පිටියේ ගෙවලා, ඊළඟට දුව එන්නේ දියඇල්ල ආසන්නයේ පොඩි හෝටලයට, ඒත් එදා ඔහුට දෙන්නට වෙනත් කාමරයක් නොවූ නිසා මෙම කාමරය ලබා දෙන්නට සිදු විය. ඔහු දවස අවසානයේ කාමරයට ඇවිත් ෂවර් එකක් ගන්න බලද්දි, බාත් රූම් එක පුරාම අමුතු ෂැම්පු සුවඳක්, ෂවර් එකේ දිග හිස්කෙස්, ඔහු ෆ්රන්ට් ඔෆීස් එකට ගියේ හවුස් කීපිං වලට දොස් කියමින්.
වසරේ එක්තරා කාලයක දී අමුත්තන් විතරක් නොව දියඇල්ල ආසන්නයේ පොඩි හෝටලයේ කාර්ය මණ්ඩලය පවා බියටපත් කරමින් තරුණ යුවලක් තැන තැන සැරිසරන්නට විය. වරෙක සුදු වේලයකින් සැරසුණ සුරූපියක් හා මංගල ඇදුමින් සැරසුණු මනාලයෙක්, තවත් විටෙක දුහුල් ඇඳුමින් එහෙ මෙහෙ සැරිසරන සුන්දරියක්, ඉඳහිට අඩි උස හීල් සපත්තු පොළවේ ගැටෙමින් මතුකරන හඬ හෝටලය තුල මෙන්ම වටා පිටාව ද බියෙන් ගිල්වන්නට විය.
නමුත් ඇන්ඩෘ නවාතැන් ගන්නා වූ ප්රියතම කාමරයේ සංචාරකයින් රාත්රියක් ගත කළේ නැති තරම්. පරිසරය විඳින කෙළිලොල් ඔවුන් හවස කාමරයට ඇතුල් වෙද්දී කාලා ඉතිරි වූ පලතුරු වට්ටිය, ඇරෙන වැහෙන සඳළුතලයේ දෝර, අඳුරු වැටෙද්දී කාමරයේ එහා මෙහා යන පාවහන් හඬ, සිනහව, බාත් රූම් ෂවර් ඇරෙන වැහෙන, දියනාන හඬ, ෂැම්පූ සුවඳ වගේ නොයෙකුත් සද්ද බද්ද ගැන හෝටලයේ ෆ්රන්ට් ඩෙස්ක් එකට පැමිණිලි ලැබෙන්නට විය. මේ කිසිවක් ඔවුනට අමුත්තක් නොවිය. "අපි ඔබට වෙනත් කාමරයක් සූදානම් කරලා දෙන්නම්", ඔවුන් පරිස්සමෙන්, සැහැල්ලුවෙන් පවසන්නට විය.
හෝටලයේ කළමනාකරණය විසින් එම කාමරය, කාමර අංක 13 හැටියට නම් කළේ මෙ අමුතු සිදුවීම් මාලාව පටන් ගත් අලුතය.
කාමර අංක 13 ඩාර්ක් ටුවරිසම් (Dark Tourism) හෙවත් හොන්ටිං ටුවරිසම් (Haunting Tourism) ගැන උනන්දුව දක්වන්නන් අතර ජනප්රිය වෙන්නට විය, එනමුත් ඔවුන් ද එහි රාත්රියක් ගත කළේ බොහෝ කලාතුරකිනි.
කාමර අංක 13හි නවාතැන් ගත් තෘප්තිමත් එකම පුද්ගලයා ඇන්ඩෘ පමණක්ම විය. ඔහු කවදත් චෙක්-අවුට් වුණේ ප්රීතියෙන් ඉපිල ගිය අමුත්තෙකු හැටියටය. ඔහු තවමත් තනිකඩය. ඔහු නවාතැන් ගන්නා අතරතුර කාලයේ දී හෝටලය බොහෝ සන්සුන්ය.
දියඇල්ල ආසන්නයේ පොඩි හෝටලය තුළ මෙන්ම අවට ද සිනා හඬ අමුත්තක් නොවිය...
දෙවෙනි කොටස කියවන්න...
* ගල්මල්-Coral ප්රබන්ධයකි.
සටහන:
Dark tourism, or haunting tourism: මරණය, ඛේදවාචක, අවතාර හෝ ඓතිහාසික වශයෙන් දුක් වේදනා හා සම්බන්ධ ස්ථාන වෙත සංචාරය කිරීම 'අඳුරු සංචාරක ව්යාපාරය' (Dark tourism) ලෙස හැඳින්වේ. ඉතිහාසය, කුතුහලය සහ අද්භූත දේ පිළිබඳ උද්යෝගය යන සාධකවල එකතුවක් මත පදනම් වූ මෙය, බිලියන ගණනක වටිනාකමකින් යුත් ගෝලීය කර්මාන්තයකි.
Solo travel: හුදෙකලාවට ප්රියයන්, තනිව සංචාරය කිරීම (Solo travel) යනු කලින් සැලසුම් කරගත් සංචාරක සහකරුවෙකු, පවුලේ සාමාජිකයෙකු හෝ සමීප මිතුරෙකු නොමැතිව, සම්පූර්ණයෙන්ම තනිවම ගමනක් යාමයි. මෙහිදී සියලු තීරණ ගැනීම, සංචාරක සැලැස්ම සකස් කර ගැනීම මෙන්ම වෙන්කරවා ගැනීම් (bookings), ප්රවාහන කටයුතු සහ දෛනික ක්රියාකාරකම් කළමනාකරණය කිරීම යන සියල්ල ඔහු/ඇය විසින්ම සිදු කරනු ලබයි.
බටහිර සමාජයේ විශ්වාසයන්ට අනුව, දින දර්ශනයේ යම් මාසයක 13 වැනි දිනය සිකුරාදා දිනකට යෙදෙන විට, එම දිනය අවාසනාවන්ත දිනයක් ලෙස සැලකේ. තවද, 13 වැනි අංකය: 12 වැනි අංකය මෙන් නොව, 13 වැනි අංකය බොහෝ සංස්කෘතික සම්ප්රදායන් තුළ අසම්පූර්ණ හෝ යම් අපහසුතාවක් ගෙන දෙන අංකයක් ලෙස සැලකේ.
තවත් හොල්මන් කතා:
- ගල්මල්-Coral: අදිසි අත
- Hot Chocolate Days: හොල්මන් කතා පොකුරක්
- ඉවාන් පවුලූශා: දෙබරු
- ගල්මල්-Coral: නිහඬ කටහඬ
- ගල්මල්-Coral: කැරකොප්පු හොල්මන
- බලුනකුට: වෙල් යායේ අද්භූත පහන් එළිය
- කොළොම්පුරේ: වවුලගල යායේ මහසෝනාගේ හෝරාව
- බකමූණු කතා: මහරගම ගුරුපාරේ කෝපිකඩේ...
- Hot Chocolate Days: බාලිකාවට ආ භූතයෝ
- ඩ්රැකීගේ අඩවිය: සීයා සහ පෙට්ටිය
- කොළොම්පුරේ: සීයා සහ පෙට්ටිය (දෙවන කොටස)
- Amazing Spring: The Night Manifest
බ්ලොග් පෙට්ටගමෙන් හොල්මන් කතා:
- දුමීගේ කට කහන කතා: මේරි ආච්චි
- සිත් ආර: අබූත
- නිදිගෙ පංච තන්තරේ: යන්ත්ර මන්ත්ර හරං කත්වා! - පළමුවෙනි කොටස
- අකුරු: අහිමි සඳ

